عمرو أديب يكشف تفاصيل ظهور طبقة جديدة في مصر: مليونيرات جُداد لانج

علق الإعلامي عمرو أديب على ظاهرة منتشرة بشكل كبير على مواقع التواصل الاجتماعي، بشأن توجيه نصائح من قبل «اللايف كوتشينج» للشباب لتحقيق طموحاتهم المادية، على غرار مشاهير مليونيرات العالم.

وخلال تقديم برنامجه «الحكاية» عبر قناة «إم بي سي مصر»، مساء الجمعة، تابع أديب: «اللي بينصحك لو يعرف الطريقة كان نفع نفسه وبقى ملياردير، مش كل الناس هتوصل، الناس اللي وصلت وصلت عشان عندها حاجة حلوة وإلا بقى كله مليونيرات».

وأكمل أديب: «اللي بينصحك واخد فلوس عشان يعمل زيارات للموقع، الموقع مش هيعلمك حاجة، ولا هيخليك عبقري، مش كل الناس هتوصل، مش كل الناس هتبقى غنية».

وواصل أديب: «مش هقولك الغنى غنى النفس، الغنى غنى الفلوس، مفيش حاجة اسمها غنى النفس، الناس اللي وصلت عندهم موهبة أو قدرة أو حاجة عبقرية، ومش عيب إنك معندكش ده، في ناس عندها وناس معندهاش، وإلا كلنا كنا بقينا مليونيرات».

واختتم أديب: «من 5 أو 6 سنوات كنا نعرف أسامي الأغنياء اللي في مصر، ده بتاع الحديد، ده بتاع العقارات، كنا عارفينهم بالاسم، لكن في الـ7 أو 8 سنوات اللي فاتوا بقى في ناس مليونيرات جداد لانج، منعرفش أساميهم، في ناس بتعمل فلوس كتير.. هما دول الـ100 اللي بياخدوا الـ100 عربية اللي نزلوا، هما دول الـ100 اللي بياخدوا الـ100 فيلا اللي نزلوا».