متصلة لشيخ على الهواء: "عاوزة أقترض 30 ألف للدجال عشان أرد زوجي بعد الطلاق.. حلال ولا حرام؟"

تحدثت فتاة مصرية تدعى آيه، عن علاقة حب كانت تجمعه بـ رجل متزوج، وذهابها إلى دجال من أجل جلب حبيبها المتزوج لكي تتزوج به.

وقالت 'الفتاة'، في تصريحات تلفزيونية، لفضائية 'الشمس': 'أنا كنت بحب واحد وكان متجوز وروحت لشيخ قال لي هعملك عمل جلب وهخليه يحبك مقابل ياخد مني 10 آلاف جنيه، وفعلا طلق مراته وتزوجني'.

وأضافت: 'عشت معاه احلى سنتين في حياتي وخلفت منه بنت وبعدين معاملته تغيرت وسباني ورجع لمراته الأولانية، وعرفت أنها راحت لنفس الشيخ اللي انا كنت روحتله'، متابعة: 'لما روحت للشيخ أعتبه واكلمه قال لي دا شغلي واكل عيشي بس أنا ممكن ارجعهولك وأخد منك 30 ألف جنيه'.

وتابعت: 'انا مش معايا الفلوس دي وقولت أخد قرض.. بس في ناس بتقول ان القرض حرام بس لو حاجة ضرورية مش حرام.. هل القرض حلال أم حرام؟!'.

وبعد نهاية المكالمة الهاتفية علقت ميار الببلاوي مقدمة البرنامج قائلة : 'أأنا ست عيانة والله انا ماشية بالأدوية'.

رد أحد علماء الأزهر

ورد الشيخ أشرف عبدالجواد أحد علماء الأزهر الشريف، قائلًا:' الست آية سايبة صلب الموضوع والكبيرة التي ارتكبتها وهي الذهاب لدجال وعمل سحر والتفريق بين رجل وامراة وتسبب في طلاق زوجته، كل هذه الجرائم دي سايبها وبتتكلم عايزة تاخد قرض عشان ترجع زوجها وهل القرض حرام ام حلال'.

وأكد الشيخ أشرف: 'لا شك إن السحر موجود ومذكور في القران والسنة،وهناك بعض المشتغلين به نسأل الله ان يهدينا ويهديهم قبل فوات الاوان السحر من أكبر الكبائر والشرك بالله'.