أكد الإعلامي عمرو أديب؛ أن جلب الاستثمارات الصناعية الخارجية تحتاج أن تمتلك الدولة بنية صناعية قوية جاذبة للاستثمار.
وخلال برنامج "الحكاية" المذاع على قناة "إم بي سي مصر" قال "أديب": "رئيس الوزراء بيتكلم النهاردة أننا عايزين نجيب أبل؛ هنجيب أبل ويقولك أنا عايز أجيب مستلزمات إنتاج ومش عارف؟ أبل هتيجي لما يبقي في بنية أساسية صناعية محترمة؛ هل أنت عندك تعمل جزء من أبل؟ أنا معرفش".
وأضاف: "الناس دي عشان تيجي هنا أنت عندك ليهم التسهيلات؟ حاجات زي دي محتاجة إغراءات مرعبة؛ في السعودية عندهم مشروعات بيجيبوها ويدوها 15% اعفاء من كل حاجة".
وتابع: "إحنا مش لوحدنا؛ طبعا مصر الجميلة والعظيمة ولكن الشركات مبتاكلش تاريخ؛ الشركات بتاكل واقع وبتبني مستقبل؛ الواقع بتاعك عامل إزاي؟ والمستقبل عامل إزاي؟ أنا مش جاي أعمل سياحة أنا جاي أفتح مصنع".
وواصل: "اللي أنا بقوله لازم اللي يبيع الاستثمار يكون حد عبقري؛ اللي هيجيبه ده لازم يكون حد عبقري أستاذ مبيعات وعنده قدرات كبيرة؛ هل إحنا عندنا ملف أو شيء نقوله لأبل ياجماعة تعالوا مصر ولا أنت جاي مصر عشان الجو حلو والمصريين لطاف والأمن والأمان".
وواصل: "إحنا مش لوحدنا في السوق؛ السوق كله عايز استثمارات؛ أنا مبكلمكش على الإقليم او أفريقيا أو الشرق الأوسط أنا بكلمك على العالم".
واختتم: "اليونانيين مثلا قالك إحنا عندنا الزراعة بتاعتنا ابعتلي 5 آلاف عامل مصري يعملولنا موسم الحصاد بتاعي؛ الـ 5 آلاف دول هيكلفوه كام؟ ولكن تصدير البضائع بتاعته؛ إحنا يا جماعة متأخرين وبنتحرك ببطيء؛ إحنا نقدر نتحرك بسرعة ونقطع المسافات بس ابتدي بقي بما أن النية موجودة أن يكون عندك مصانع وإنتاج".
تابعوا آخر أهل مصر على Google News
