أشاد الإعلامي أحمد موسى، بتصريحات الدكتور مصطفى مدبولي رئيس مجلس الوزراء اليوم حول موعد انتهاء تخفيف أحمال الكهرباء وملفات الغاز الطبيعي والطاقة المتجددة وأيضًا مشروعات الزراعة، قائلاً: «منهجي دائما هو الدفاع عن الوطن، وبقول لأي حد لو انت مش قد الكلام متتكلمش، ويجب الدفاع عن البلد بكل قوة».
وخلال تقديم برنامج «على مسئوليتي»، عبر قناة «صدي البلد»، تابع موسى: «إحنا دولة مش ثابتة فعلا زي ما رئيس الوزراء قال وعدد سكان مصر هيوصل لـ 120 مليون نسمة بحلول 2030 لو فضلنا بنفس المعدلات اللي ماشيين بيها».
وأكمل: «إحنا بنستلف عشان نوفر احتياجاتنا، ونغطي تكاليفنا، ومن المشروعات الكبيرة اللي مصر نفذتها خلال الفترة الأخيرة وكانت مفيدة بدرجة كبيرة؛ مشروع افتتاح 5 محطات مترو أنفاق جديدة في الخط الثالث، واللي بينقل في اليوم الواحد بس 50 ألف مواطن، ومن المقرر زيادة المعدل ووصوله إلى 300 ألف مواطن يوميًا خلال الفترة المقبلة».
وواصل: «محطات المترو الجديدة دي مش في برلين ولا فرنسا، دي في مصر في بولاق الدكرور وجامعة القاهرة، ولكن مستوى النظافة والتكنولوجيا زيها زي الموجودة في برلين».
وأردف: «دي بلدنا كلنا مش بلد الرئيس لوحده، الناس كلها بتركب المترو وتقول إحنا ركبنا المترو ده بنظافة ألمانيا والدول الأوروبية الكبرى، البلد كانت خرابة من 2011 لـ2013، والرئيس السيسي قال أنا استلمت البلد كهن».
وأكمل موسى: «الـ 5 محطات مترو دول تم افتتاحهم من أسبوعين بالتحديد، وده أحدث مشروع اتعمل في مصر خلال السنوات الماضية، والشعب المصري يستحق يكون عنده أفضل حاجة».
وأشاد "موسى" بإنجازات الرئيس السيسي خلال السنوات الماضية، قائلا: «مش محتاج حد يدافع عنه، ويكفيه قرار 3 يونيو 2013، إنجازاته بتتكلم عنه حقيقي مش محتاج كلام، ولابد من الوقوف بجانب الوطن من أجل بقائه».
تابعوا آخر أهل مصر على Google News
