هشام الإمام: عمري ما شوفت صبري نخنوخ.. ومعنديش معرض سيارات في التجمع

كشف هشام الإمام صاحب مطعم الأكابر حقيقة علاقته بواقعة صبري نخنوخ، قائلا: "صحيت من النوم لقيت العالم كله بيتصل بيا، وأنا فعلًا عندي معرض سيارات، لكن مليش أي علاقة بالموضوع".

وخلال تصريحات ببرنامج "حضرة المواطن" تابع الإمام: "كل وكالات الأنباء والصحف اتصلوا بيا بعد القبض على صبري نخنوخ.. يا جماعة مش أنا والله ولا ليا علاقة بالموضوع.. أنا بجد زهقت ومش عارف أعمل إيه".

وأكمل الإمام: "الناس على السوشيال ميديا بينشروا صوري ويقولوا هو ده اللي قضى على صبري نخنوخ وأنا أصلًا كنت نايم في بيتي وقت واقعة معرض السيارات اللي هو مش بتاعي ولا ليا علاقة بالقصة".

وواصل: "عمري ما شوفت صبري نخنوخ ولا أعرفه، والناس دخلتني في الموضوع لمجرد إن صاحب معرض السيارات اسمه محمد الإمام، وأنا معنديش أخ اسمه محمد.. أنا عندي هاني وممدوح".

وأضاف: "أنا أسرتي مرعوبة وبقيت أخاف أمشي في الشارع.. الناس بتشوفني تقول ده اللي ضرب صبري نخنوخ.. يا نهار أسود أنا أضرب صبري إزاي؟".

واختتم: "أنا مش جامد ولا بتاع زي ما الناس بتقول، ولا أعرف صبري نخنوخ، ولا عندي معرض سيارات في التجمع، وهقاضي كل اللي ذكر اسمي في الواقعة.. ده الناس كمان نشروا صورتي".