'إزاي اختار شريك حياتي؟'، هذا السؤال يتردد على ألسنة الفتيات والنساء المقبلات على الزواج، لرغبته في معرفة الصفات التي يجب أن تتوافر في شريك حياتها وزوج المستقبل، قبل الوقوع في فخ الزواج ودخول عش الزوجية، حتى تتمتع بزواج ناجح، وتعتبر التجربة، هى أكبر اختبار حقيقي للكشف عن الصفات الضرورية في شريك الحياة، لذلك نصائح النساء المتزوجات هي الأكثر واقعية عند اختيار شريك الحياة.
إزاي اختار شريك حياتي؟
وترصد 'أهل مصر'، إجابات النساء المتزوجات على سؤال 'إزي اختار شريك حياتي؟' من خبرتهم وبعد خوض التجربة، ما هى المواصفات التي يجب أن تكون موجودة في شريك الحياة حتى يستمر الزواج بدون فشل أو إرهاق نفسي للزوجة ويكون زواج سليم؟
ومن جانبها كشفت مروة فتحى، عن مواصفات شريك الحياة، قائلة :'أولا بنات كتير بتعتقد أن الزواج قائم علي الحب، وهذه فكرة غير صحيحة، لأن الزواج قائم على التفاهم، بمعنى هل نقدر نتفاهم حتى نصل لحلول في مشاكلنا ونقدر نتناقش بشكل راقي، بعيدا عن الزعيق والخناق على أتفه الأسباب، دون الوصول لحل، وربنا قال في كتابه وجعلنا بينكم مودة ورحمة، مقالش حب دي خالص ومع الوقت والعشرة الحب بيبهت وبتفضل المودة ولازم يكون رحيم ويلتمس لك الأعذار مش يقف لك على الواحدة'.
وأضافت فتحي:' ثانيا لازم يكون في توافق فكري بينكم عشان متتصدميش لما مثلا تعرفي بعد الجواز أنه شايف أن لبس البنطلون حرام أو إن طالما سمح لك تشتغلي يبقي مرتبك ملكه أو حتى يفتش في موبايلك بحجة أن ربنا قال كده خلي بالك من النقطة دي كويس جدا'.
واستطردت: 'ثالثا بلاش الراجل البخيل ولا اللي بيشتم ويتنرفذ لدرجة أنه ممكن يكسر حاجة في البيت لأن هيجي وقت ويكسرك انتي أو بمعني اصح يمد إيده عليكي'.
الجواز حظ
وأجابت دينا كمال بسخرية، على سؤال ' إزاي أختار شريك حياتي؟'،:' من واقع خبرتي الجواز حظ يعني انتي وحظك، بس الرجال كلهم عندهم إعاقة مافيش حد سليم والله أعلم'.
بينما هويدا القاضي، قالت:' اللي يثبتلك قولا وفعلا إنه بيحبك'.
الحب والصراحة اقرب طريق لحياة زوجية سعيدة ومستقرة
وكشفت دعاء أنور، عن مواصفات شريك الحياة:'أهم حاجة فى اختيار شريك الحياة التوافق الاجتماعي والفكري بينهما والأخلاق طبعا وأن يكون على خلق ودين علشان يراعي ربنا معها و كل اللى بيعمله، والمشاركة فى كل الحاجات بين الطرفين مهم جدا ومش عيب يساعدوا بعض، لأن الزواج حياة مشتركة بين الطرفين ومن وجهة نظري المتواضعة، أيضا الحب والصراحة اقرب طريق لحياة زوجية سعيدة ومستقرة'.
وقالت أنور:'المهم اللى يتقى ربنا فيكي ويكون لديه أصل ومتربي على انه يكون راجل وأهم حاجه أن اى حاجه بينك وبينه، ما يحكيهاش لحد مهما كانت تافهه ولو حصل مرة وعملها ونبهتيه واتكررت لازم تسيبيه فى لحظتها علشان ده هيبقى غير أمين على أي حاجة'.
راجل في التصرفات
ووصفت رحاب خيرت:' أهم شئ فعلا يبقي راجل مش في البطاقة ولا الشكل في التصرفات والمواقف بينهم.
بينما قالت مروة حامد:'أهم حاجه متدين بمعنى أن الدين عنده عباده مش عادة، وعارف يتعامل مع الست إلى حد ما زي رسولنا قال استوصوا بالنساء خيرا؛ورفقا بالقوارير، كل ده الواحدة هتفهمه من أول قعده معاه، ويكون مثقف تتكلمي معاه تحسيه فاهم الدنيا ومش متكبر ولا بتاع منظرة وبردوا هتفهمي الكلام ده وهيبان من أول قعدة معاه، وطبعا مننساش انه يكون حاله ميسور ويقدر يفتح بيت لوحده مش بمساعدة حد، راجل واخد على المسئولية رأيي الشخصي'.
تحديد صفات شريك الحياة في ورقة
ومن جانبه كشف إبراهيم أحمد، مدرب تنمية ذاتية وباحث في علم الطاقة والميتافيزيقيا، التعبير عن كل ما يدور داخل الإنسان: 'كيفية السعي وراء شريك الحياة ويارب يكون خير للبنات ؟، أولآ السعي، فانتظار النصيب دون السعي معناه أن مفيش حاجة هتيجي لسبب أن أي هدف في الدنيا بيتحقق بالسعي، ثانيآ تحديد صفات شريك الحياة، وليكن في ورقة تحديد مواصفات شريك الحياة بدقة، ترتيب الصفات من أعلي إلي أسفل، البعد عن الصفات السلبية عن الخيال قال رسول الله صلى الله عليه وسلم (البلاء موكل بالقول)، بمعني لو تخيلت شئ سلبي أو إيجابي يحدث'.
تابعوا آخر أهل مصر على Google News
