شهدت محاكم الأسرة العديد من قضايا الخلع والطلاق خلال هذا الأسبوع، باختلاف الأسباب والدوافع، أبطال هذه القصص أشخاص عاديون ولكن كتب لهم القدر أن تسجل أسماؤهم فى سجلات القضاء، وترصد " أهل مصر " أغرب القضايا التى طرأت على محكمة هذا الأسبوع.
إسراء: "بخيل وغضبنى عند أهلى عشان كارت شحن"
"دايما بيبخل عليا فى الفلوس، ويشتكى انه مش معاه واللى جاى على قد اللى رايح، على الرغم انى متاكدة انه معاه وبيكسب كويس لكن هو بيحب يشيل للزمن وميعرفنيش سره، لحد ما كنت مستلفة وطلبت منه يشحن لى عشان أكلم والدتى رفض وقالى مش معايا اشحن لك، واستفزنى لحد ما قولتله لما انت مش قد الجواز اتجوزتنى ليه راح غضبنى".. بهذه الكلمات شكت إسراء زوجها أمام محكمة الأسرة بزنانيرى أثناء نظر دعوى الخلع ضده بعد عامين من الزواج مبررة استحالة العشرة معه.
محمد: "بتتكبر عليا بفلوس أهلها ورفعت في وشي السكينة"
"تعبت من العيشة معاها، وهى فرحانة بأهلها وفلوسهم وكل حاجة تتعامل معايا بتعالى وتكبر، لحد ما افتكرت انى سكوتى ضعف منى، واتجرأت ورفعت عليا السكينة عشان رفضت انها تروح بيت أهلها".. بهذه الكلمات شكى محمد زوجته أمام محكمة الأسرة أثناء رفع دعوى نشوز ضدها ليحرمها من حقوقها بعد ٣ سنوات من الزواج مبررا ذلك بخروجها دون إذنه وقامت برفع السكين عليه لتجبره على فتح باب الشقة لها عندما أغلقه لمنع خروجها.
سمر: "اكتشفت أنه بيخونني مع 3 بنات"
كنت دايما بشك فيه، ومتأكدة أنه بيخونى، لكن كان بيكذبنى، ويتهمنى أنى شكاكة وبهدم بيتى بالشك والوسواس وهو الطاهر الشريف اللى مش ممكن يكدب ولا يخون، لحد ما ربنا كشف ستره من كتر عمايله واكتشفت أنه على علاقة بـ٣ بنات على النت وبيتسلى معاهم وكلامهم عدى كل حدود الأدب والاحترام".. بهذه الكلمات المبعثرة شكت سمر زوجها أمام محكمة الأسرة بشمال الجيزة أثناء نظر دعوى الخلع التى أقامتها ضد زوجها مبررة استحالة العشرة معه بعد ٥ سنوات من الزواج.
نهى: لو سلمت على حد بإيدي يتهمني بأني على علاقة بيه
كل تصرفاتي بيشك فيها، ديمًا بيحسسني أني بخونه، منعني من الخروج ولا زيارة أهلي لوحدي، حتى صحباتي ممنوع أنهم يزورني غير بعد ما استئذن منه، لدرجة أنه وصل لو شافني في مناسبة وسلمت على حد من أقاريبي يتهمني أني على علاقة بيه، لحد ما أقسم ليه، وبقى دا حالنا لحد ما زهقت من حياتي"بهذه الكلمات شكت نهى زوجها أمام محكمة الأسرة بشمال الجيزة أثناء نظر دعوى الخلع التي أقامتها ضد زوجها، مبررة استحالة العشرة معه بعد عامين ونصف من الزواج..
رحاب: عامل نفسه شيخ المنطقة واكتشفت أنه قواد
" مش عارفة ازاي قدر يخدعني أنا وأهلي، ويوهمنا أنه رجل ملتزم وميعرفش حاجة في حياته إلا المسجد وفعل الخير، واكتشف بعد الزواج أنه قواد فتيات ويعمل في الدعارة في الخفاء، ويلبس ثوب الطهر أمام الناس وأمامي، ولكن الله كشف ستره لتظهر حقيقته".. بهذه الكلمات شكت رحاب زوجها وهي داخل محكمة الأسرة بزنانيري، لرفع دعوى خلع من زوجها بعد عام ونصف من الزواج مبررة ذلك باستحالة العشرة معه بعد أن علمت أنه قواد فتيات ويكسب أمواله من الدعارة، وتزوج منها لتكسبه المظهر الاجتماعي أمام الناس.
تابعوا آخر أهل مصر على Google News
