شهدت محاكم الأسرة العديد من قضايا الخلع والطلاق خلال هذا الأسبوع، باختلاف الأسباب والدوافع، أبطال هذه القصص أشخاص عاديون، ولكن كتب لهم القدر أن تسجل أسماؤهم فى سجلات القضاء.
ويرصد " أهل مصر " أغرب القضايا التى طرأت على محكمة هذا الأسبوع.
هند: "حماتي بتشك اني على علاقة بزوجها"
آخر حاجة ممكن أتخيلها أن حماتى تفهم العلاقة الطيبة والاحترام اللى بينى وبين حمايا على أننا على علاقة ببعض وتهددنى وكمان تعملى مشاكل مع جوزى من ورايا لحد ما يضربنى، وهى تظهر بريئة قدام الكل، منها لله خربت بيتى ونكدت عليا عيشتي وخلت زوجى يسيبنى معلقة من غير طلاق عشان مخدش حقوقي".. جاءت هذه الكلمات على لسان هند من داخل محكمة الأسرة بزنانيري لرفع دعوى خلع من زوجها بعد عامين ونصف من الزواج مبررة استحالة العشرة معه بعد تعديه عليها بالضرب ورفض تطليقها.
ندى: "بيعايرني بجسمي وهو كرشه مترين"
تقدمت ندى صاحبة الـ٢٨ عاما، بدعوى خلع أمام محكمة الأسرة بزنانيري، بعد عام ونصف فقط من الزواج مبررة استحالة العشرة معه قائلة: "بجد إنسان غريب مش شايف نفسه عامل ازاى، وكرشه قدامه مترين وعلى الرغم من ذلك بيعايرنى بالترهلات اللى ظهرت فى مناطق فى جسمى، نتيجة انى بخس، وبقي يتريق عليا قدام أهله عادى، ولا يراعى مشاعرى، لحد ما وصلنى انى كرهته وكرهت جسمى منه لله إنسان مش طبيعى ولازم يتعالج".
وفاء: "بيقول لى انتي أجمل ستّ بس انا عيني زايغة"
"المشكلة انه بيعترف انه راجل عينه زايعة، وبيعمل علاقات مع الستات وعرف عليا واحدة واتنين وثلاثة، ولما اعرف واقوله فيا ايه مش عاجبك وأنا أغيره، يقول لى المشكلة مش فيكى، المشكلة عندي أنا راجل عينى زايعة وبحب الستات، لكن انتي أحسن ست فى الدنيا، أقسم لي إنه هيتغير لكن للأسف زى ما هو، وأنا مش قادرة استحمل خيانة اكتر من كدا".. نطقت بهذه الكلمات وفاء من داخل محكمة الأسرة لرفع دعوى خلع من زوجها بعد عامين ونصف فقط من الزواج مبررة استحالة العشرة معه.
أميرة: "بياخد شقى خدمتي في البيوت يشرب بيه حشيش"
تعب وأشتغل طول النهار فى خدمة البيوت، ولما ارجع البيت ألاقيه مستنى يأخد منى الفلوس عشان يروح يشرب بيها، وميفكرش يجيب لنا لقمة فى البيت نأكلها، ممكن نقعد بالأيام ما فيش حاجة تتأكل فى البيت بسبب الحشيش اللى بيشربه، وعايشة أنا وابنتى على الأكل الصدقة اللى باخده من الناس اللى بشتغل عندهم لحد ما كرهت عيشتى بسببه، وقررت أعيش أنا وبنتى بعيد عنه أرحم".. بهذه الكلمات شكت أميرة زوجها أمام محكمة الأسرة أثناء نظر دعوى الخلع التى أقامتها ضده بعد ٥ سنوات من الزواج مبررة ذلك باستحالة العشرة معه.
محمد: "بتكلم شباب على النت"
"كنت بثق فى كل تصرفاتها، وسبتلها مساحة من الحرية وخاصة أن شغلى بيضطرنى للسفر أحيانا كتير، وهى عارفة دا ووافقت على نظام حياتى قبل الزواج، لكن فوجئت بعد ما اتزوجنا بسنة ونص أنها عملت أكونت جديد وإيميل باسم مستعار وبتكلم شباب على النت، اتجننت لما شوفت الرسايل والكلام بينهم لدرجة أنى فكرت اقتلها".. بهذه الكلمات شكى محمد زوجته أمام محكمة الأسرة لرفع دعوى تطليق من زوجته مبررا استحالة العشرة معها.
تابعوا آخر أهل مصر على Google News
