محاكم الأسرة في أسبوع: نورهان: "طلع قواد وعايزني أسهر مع أصحابه".. وبسمة: "أمه بتأكله الفراخ وتسيب لي البواقي والعضم"

شهدت محاكم الأسرة العديد من قضايا الخلع والطلاق وغيرها خلال هذا الأسبوع، باختلاف الأسباب والدوافع، أبطال هذه القصص أشخاص عاديون ولكن كتب لهم القدر أن تسجل أسماءهم فى سجلات القضاء.

وترصد " أهل مصر " أغرب قضايا الخلع التى طرأت على المحكمة هذا الأسبوع.

نورهان: "طلع قواد وعايزني أسهر مع صحابه"

"كنت بحبه واتحديت أهلي عشان اتجوزه مع انه غير مناسب ماديا ولا اجتماعيا، لكن خدعنى بالحب والكلام المزيف، وبعد ما اتزوجنا اكتشفت انه اتجوزنى عشان جمالى وأنه بيشتغل قواد وطلب مني أقعد فى سهرة مع أصحابه فى البيت، ولما رفضت أجبرنى واكتشفت انه مصورني معاه فى العلاقة عشان يهددنى ويجبرنى أوافق على اللى عايزه".. بهذه الكلمات شكت نورهان زوجها فى دعوى الخلع التى أقامتها ضد زوجها بعد 6 أشهر من الزواج مبررة استحالة العشرة معه.

فاطمة: "اتقفش وهو بيعاكس جارتنا وانضرب علقة وانطردنا"

"طول الوقت مهتمة بيه، وبنصحه انه يغض بصره عشان معاه بنتين، ويأكدلى انه عمره ما بص لواحدة، لحد ما وثقت فيه وأنه عمره ما هيخونى، لحد ما فوقت على واقع انه كذاب وكان بيعاكس واحدة جارتنا وبيحاول يتكلم معاها، لحد ما فى مرة شافه جوزها وعمل له مشكلة واتخانق معاه وسط الشارع وكانت فضيحة، ومن اللحظة دى كرهته وكرهت أنى أبقى على ذمته رغم انه اعتذر".. شكت فاطمة زوجها بهذه الكلمات أمام محكمة الأسرة أثناء نظر دعوى الخلع التى أقامتها ضد زوجها مبررة استحالة العشرة معه بعد ٥ سنوات من الزواج.

بسمة: "أمه بتأكله الفراخ وتسيب لي البواقي والعضم"

"حماتى ست مش طبيعية هى وابنها، كانت أكبر غلطة فى حياتى انى وافقت أعيش مع أمه فى بيت واحد، كانوا بيعاملونى بطريقة مهينة وكلها ذل، لدرجة أنها مش بتخلينى أقعد آكل معاهم، ولو كلت تحط اللحم أو الفراخ قدامها هى وابنها ولما يخلصوا تحط لى البواقي حتى لو عضم الفراخ".. شكت بسمة زوجها بهذه الكلمات أمام محكمة الأسرة بزنانيري لرفع دعوى خلع من زوجها بعد عام واحد من الزواج مبررة استحالة العشرة بعد أن رفض أن يعيش بشقة منعزلة عن والدته.

عزة: "لو حصل احتكاك مع الجيران بيجري يستخبى"

"إنسان سلبي بمعنى الكلمة، ميعرفش يتحمل مسئولية أى شيء، وضعيف لدرجة انه ابنه اللى ٥ سنين بيلعب مع الأطفال فى الشارع، وضربوا بعض وعملوا مشكلة وأنا نزلت أتكلم مع الناس فى الشارع وهو يستخبي جوة الشقة، عمره ما حسسنى ان معايا راجل فى البيت يحمينا، حتى جوز اخته شتمنى وهو ما قدرش يرد عليه ولما اتخنقت عشان يرد يقول لى ما أنا بشخط فى مراته عادى".. بهذه الكلمات شكت عزة زوجها أمام محكمة الأسرة لرفع دعوى خلع منه بعد ٦ سنوات من الزواج مبررة استحالة العشرة معه أكثر من ذلك بسبب سلبيته وضعفه أمام الجميع.

سارة: "أمه بتقوله نزل مراتك الخدامة تشوف طلباتنا وهو مبيردش"

"تعبت من أسلوب والدته معايا، انا بساعدها من نفسي، عشان رضا جوزى لكن هى عايزة أمر مفروض عليا انى لازم أصحى أنزل اخدمها، وتعزم بناتها وانا اللى اطبخ وأغسل وانضف، وهما يقعدوا يتكلموا، وكل ما اقول لجوزى يقول لى معلش أستحملى امى مينفعش أزعلها، لكن مقدرتش اسمعها وانا تعبانة تقول لى لجوزى نزل الخدامة مراتك تشوف طلباتنا".. نطقت سارة بهذه الكلمات أمام محكمة الأسرة أثناء نظر دعوى الخلع التى أقامتها ضد زوجها بعد عام فقط من الزواج مبررة استحالة العشرة معه بعد أن رفض أن يسكن فى شقة بعيدة عن والدته.