يبدو أن الأفراح حدث لا يقتصر على العريس والعروسة، بل تتداخل فيه عناصر وشخصيات بشرية عديدة، تضع بصمتها على فرحك بشكل واضح وتعتبر من أيقونات الأفراح التى لا غنى عنها فى أى فرح، لتظل هذه الشخصيات عالقة فى ذاكرتك، كلما تذكرت ليلة العمر واسترجعت شريط الفرح وتبدأ بالتعليق على كل شخص منهم
1- حلاق العريس
من الشخصيات التى يبدأ معها العريس رحلة من العذاب، فى حلق ذقنه "112 وش لحد ما تخضر"، ويضع العديد من الماسكات على وجه حتى تتغير ملامحه، ويرش "الترتر" على شعر العريس حتى يميزه فى تلك الليلة.
2- ملك المزاج
شخصية تقرر فجأة "إنه لازم يقف جنب العريس بكل ما هو محرم شرعًا وقانونًا وصحيًا"، ومد العريس بأي مخدرات معه لتجعله "وَحش الشاشة"حتى ينسى ده فرح مين أصلًا.
3-مسئول عربية الزفة
بعد أن يتم تزين السيارة بالورد على حساب العريس، تجد شخصية تجلس خلف طارة القيادة ويقرر أن "يبسط العريس والعروسة" ويلطف الأجواء بحركات بهلوانية فيتمايل يمين وشمال بالعربية فى وسط الطريق، ويتسبب فى "كركبة بطنهم".
4- كوافير العروسة
العروسة تقضى عنده فترة قبل الفرح حتى يغير ملامحها وتحصل على لقب "عروسة"، ويتفنن فى تغيير ملامح العروسة وكل اللى مشاركينها، "فممكن تقوم 3 ثورات وتتشكل حكومة ويتم إقالتها ويظهر المهدي المنتظر ولسه العروسة في مرحلة اللمسات الأخيرة بينما ينتظرها العريس والرجالة "بره".
5-مسئول القاعة
عليك أن تستحضر صوت بيومى فؤاد وهو يقول "يا فندم بروجرام القاعة عندنا متميز جدًا؛ العروسة لما توصل هنشغل لها "طُلي بالأبيض" بعدها العروسين يدخلوا والدنيا ضلمة والدخان مالي الجو، ويرقصوا "سلو"، بالاضافة "لشو التورتة اللى العروسين يهوشوا بعض بشوك التورتة قبل ميأكلوها لبعض" فهو من الشخصيات التى ستعلق فى ذهنك طويلا وكأنه صاحب فضل عليك. 
6- المأذون
هو شخص نص محامي ونص شيخ، يشرفك بالحضور لمدة ساعة ويمضي بضعه أوراق ويأخد ألوف الجنيهات أو نسبة من المؤخر، ويدعي لهم "اللهم بارك لهما واجمع بينهما في مودة ورحمة".
7- الدى جى
تلك البدعة التى ظهرت بديلة للفرقة الغنائية التى تحى الفرح، ولا تفهم "هو عايز يقول إيه ولمين"، وكل مهمته جمع أصدقاء العريس والعروسة "ييجوا يمين وكلنا نحيي العروسين، وعايز نفضي البيست ونرقص عليه في نفس الوقت، ويطالب سيدات الفرح بأداء دورهم التراثى"سمعونا الزغروطة الحلوة".
8- بتاع الفيديو
الكاميرا هى الوسيلة لتخليد ليلة العمر، "بس مع فوتوجرافرز" الأفراح الكاميرا بتكون وسيلة للحسرة على الصور التى قد تسجل لك لقطات رائعة ومدهشة! وإذا كانت كاميرا ڤيديو فهي وسيلة تعذيب للمعازيم "اللى بيتكعبلوا في سلك الكاميرا"، ويقوم القائم بالتصوير بعمل فيلم ساعتين ومكتوب عليه جملة "مبروك للعروسين" حسب رؤية المخرج.
9- أهل العروسين
مجموعة من المعازيم التى لا يكون لها موضوع إلا الغمز واللمز على العريس والعروسة، "العريس مأتب وشكله مريض نفسي".. "العروسة دي مشيت مع طوب الأرض قبل ابننا ما يلبسها".. "شوف نسايبنا العرر لابسين إيه".. "شايفة الجاتوه البايت" "تعالى نسلم عليهم ونعمل بأصلنا"، وهكذا يجلسون لكل "سقطة ولقطة" فى الفرح بتعليقاتهم المدهشة. 
10- الأطفال أحباب الله
من أكثر الكائنات التى تزعج العريس، خاصة بعد تناول الجاتوه "بوس عمو ويمسح ايده فى البدلة او يدوس ع الجزمة، بالاضافة إلى البكاء والزن والجلوس على "حِجر العريس عشان يظهروا في كل صورك معاه"، أو يتشعلقوا في ديل فستان العروسة.
11-بائس الفرح
ليس له دور فى الفرح غير الجلوس فى أخر القاعة، وينظر للناس نظرات حزينة، ويدخل في حالة من رثاء الذات، "بيتحسر على كل حاجة في حياته"
12-وصيفات العروسة
مجموعة من صديقات العروسة "أغلبهم ماتجوزش لسه"، مهمتهم مساعدة العروسة؛ من خلال إشارات معينة "لوعايزة تظبط الميك آب أو عايزة تروح الحمام أو عايزة تقتل أم العريس"، لكن عادة ما ينسوا هذه الترتيبات "لما بيشوفوا صحاب العريس وبيتحولوا لجماعة من قبائل الـattention whore اللي هدفهم جذب انتباه أي كائن حي.
تابعوا آخر أهل مصر على Google News
