امتنع الشارع البورسعيدى عن شراء فوانيس رمضان وذلك بعد الارتفاع الجنونى فى الأسعار التى جعلت سعر الفانوس يصل إلى أضعاف الأضعاف ليتخد الشارع البورسعيدى شعار" مش عايزين فوانيس السنادى".
وقد التقت "أهل مصر" بعدد من تجار وبائعى الفوانيس بمحافظة بورسعيد وذلك للوقوف على أسباب عزوف المواطنين عن الشراء هذا العام.
قال على محسن "تاجر فوانيس": "الإقبال متراوح على فوانيس دمياط ودى اللى شبه فوانيس رمضان القديمة اللى اتربينا عليها"، لكن ارتفاع الدولار طال كل الفوانيس الصينى والدمياطى فارتفاع الأسعار أثر على كل المنتجات، مشيرا إلى أن ارتفاع الدولار جعل التجار يقللون من كميات الفوانيس التي يشترونها لارتفاع أسعارها.
وقالت كريمة عبد الغنى " تاجرة فوانيس "كل سنة بنفتح، عمرنا ماشوفنا الغلو ده مش عارفين نبيع حاجة" بقينا قاعدين بنش محدش بقى بيشتري حاجة كله بيجى يتفرج ويمشى، الفانوس اللى كنا بنبيعه زمان ب50 جنيه دلوقتى سعره بقى 200 جنيه يعنى زاد فوق الضعف.
وتابعت: "السنة اللى فاتت كنا بنفرش من شهر رجب وكان الإقبال كبير والناس كانت بتيجى تشترى دلوقتى مفضلش إلا 15 يوم ورمضان يهل ومفيش حد بيشترى مبقناش عارفين نبيع".
واستطردت: "ارتفاع سعر الدولار كان له عامل كبير على انخفاض الشراء وأيضا نحن كتجار لم نستطع أن نأتى بكمية كل عام من الفوانيس فهذا العام قمنا بشراء كمية أقل بمبلغ أعلى وبرضه " محدش بيشترى".
وقالت غادى حسين: "ربه منزل" ولادى بيطلبوا منى فوانيس بس أنا عندى 3 أطفال لو جبتلهم فوانيس مش هعرف أجيبلهم جزء من الياميش، الأسعار غالية جدا والفانوس الكويس معدى ال100 جنيه يعنى محتاجة 300 جنيه فوانيس بس، طب أجيبلهم أكل إزاى بقى وأبوهم راجل شغال باليومية على باب الله.
وتابعت كنا زمان بنجيب الفانوس ب25 جنيه لكن دلوقتى أجيبه بـ100 إزاى بس مش هنجيب فوانيس السنادى وهخلى الولاد يلعبوا بفوانيس السنة اللى فاتت.
وأضاف كريم توفيق "تاجر فوانيس" الأسعار السنادى غير كل سنة وطبعا مفيش إقبال زى كل سنة اللى بينزل يشترى فانوس أو اتنين بيعدى ال300 جنيه والفوانيس المصرى برضه غالية والصينى كله بقى الضعف اللى كان زمان ب60 جنيه دلوقتى بقت ب100 جنيه و160 جنيه وده يرجع لارتفاع سعر الدولار طبعا.
وتابع خالد وليد "بائع فوانيس": "الفانوس الصينى اللى كان بـ45 جنيه دلوقتى زاد الضعف وبقى بـ150 جنيه والإقبال بقى ضعيف جدا".
وأضاف: "الناس بدأت تتجه للفانوس الدمياطى الخشب اللى سعره زاد برضه وبقى بيبدأ من 55 جنيها وينتهى ب250 بس الناس اللى عندها أطفال بتشترى الصينى علشان الأطفال بتختار الألعاب مش الفوانيس التقليدية".
تابعوا آخر أهل مصر على Google News
