عقد مرتضى منصور رئيس نادي الزمالك، جلسة مع البوركيني محمد كوفي، لاعب فريق الكرة الأول، بمقر القلعة البيضاء، عقب الأزمة الأخيرة التي اندلعت بسبب تهديد اللاعب بفسخ تعاقده مع الزمالك؛ بسبب المستحقات المالية.
وواجه رئيس الزمالك اللاعب، قائلًا: "أنا من 3 أيام جيتلكم الصالة المغطاه وشعرت بأنك مش مبسوط وحتى قولتلك كوفي انت مش مظبوط عندك مشكلة؟.. قولت لي لأ.. قولتلك لو عندك مشكلة في بلدك.. قولتلي أه المشكلة في البلد".
تابع، "أنت عندك مشكلة مقولتليش ليه، كان من يومين عدني حازم إمام وحمادة طلبه وقالولي عليها وحليتهالهم، وأنا فاتح مكتبي ليكم كلكم، لما يكون في عندك مشكلة نفسيًا فنيًا بدنيًا مالية تعالى قولي".
واصل، "عندي لاعب عمل مشكلة كبيرة هو لاعب دولي يلعب في منتخب بلاده لاعب محترف بيلعب في نادي كبير هو نادي الزمالك، فجأة محضرش التمرين مارضيش ياخد فلوسه من الخزنة وقفل تليفونه ورفض أنه يسافر مع الفريق في مباراة هامة بنيجيريا، هل في لاعب دولي يتصرف نفس التصرف؟!..الكورة دي مهنته وحرفته ومصدر رزقه هو عنده مشكلة مش عارف يحلها مدير الكرة يجي يقول لرئيس النادي، هو مجاش ليه يجي يقولي زي ما الناس كلها بتعمل".
أضاف، "دلوقتي أنا زعلان منه للأسباب التالية، 1- لأنه مجاليش، 2- لأن انطباعي عنه أنه لاعب محترف ومحترم وملتزم ومهما تكن الأسباب ميسبش ماتش، 3- أنه مايسبش تدريب علشان سمعته هو، 4- ميدخلش محاميين بين ناديه إلا لما يكون في مشكلة مع ناديه والولية الإسبانية دي مش هاسبيها، 5- أنت عندك عرض محترم يليق بنادي الزمالك بعد الموسم ما يخلص هرحب بيه وتمشي ومعنديش مشكلة كله بالود والاحترام، 6- هو استفاد ايه الجماهير زعلت منه والجهاز الفني لانه غلط فيه الجماهير بتحبه والجهاز بيلاعبه ولازم يعتزر للجماهير والجهاز قبل مانكمل الحديث".
وقال كوفي، "أنا لاعب محترف ودي مهنتي ولن أترك تدريب أو ماتش، وبحترم الكابتن محمد حلمي وهو بيديلي القوة وإني أتمكن من اللعب لأنه مدرب كبير وكان لاعب كبير، وبقول لجماهير الزمالك عمري ما أعمل حاجة ضد الزمالك وبعتذر ليهم وللجهاز الفني، وبحارب من أجل الزمالك، وحتى أنا قبل ما أنضم للزمالك وأنا من الجماهير فكنت بشجع الفريق وقتما كنت لاعب بتروجت، لما جيت نادي الزمالك اعتبروني ابن من أبناءه وعمري ماشوفت أي لاعب أجنبي بيتعامل بالشكل دا علشان كده أنا بقدر النادي وجماهيره".
تابعوا آخر أهل مصر على Google News
