عبرت رحاب جمعه نجمة كرة اليد ولاعبة نادي سامبر الفرنسي، عن استيائها من قيام بعض الإعلاميين بالهجوم عليها وتناول طلبها بتكوين منتخب قومي للسيدات بشكل مسئ.
وأكدت عبر صفحتها الشخصية علي موقع التواصل "فيس بوك" أن كلامها يزعج البعض ورغم ذلك ستستمر في طلابتها وطلبات زميلاتها المشروعة، بتمثيل منتخب بلادهن، لافتة إلي أنها تتكلم بلسان كل اللاعبات اللاتي يصمتن الآن خوفا من غضب المسؤولين وحدوث ردود أفعال سلبية تجاههن.
وقالت رحاب علي صفحتها الشخصية علي فيس بوك :
"واضح أن مطالبتي بتشكيل منتخب أول للسيدات مضايق إعلاميين كتير مني معرفش ليه، الإعلامي أحمد شوبير شغال تقطيع وهجوم فيا معرفش إيه السبب؟
يا جماعة هل المطالبة بتشكيل منتخب أول للسيدات خيانة؟
يا جماعة هل مطالبتي بتشكيل منتخب أول للسيدات يعني أني لاعبة بتعمل مشاكل؟
كابتن شوبير حابة أقول لحضرتك حاجة:
1. أنا بحب بلدي جدًا جدًا وسبب مطالبتي بتشكيل منتخب أول للسيدات هو تمثيل مصر في كافة البطولات وتحقيق إنجازات لبلدي.
2. كابتن شوبير أنا مشكلتي إني مش بعرف أسكت في الحق عشان كده اتكلمت رغم صمت لاعبات كتير نفسهم في منتخب أول للسيدات.
3. كابتن شوبير أنا عارفة إني لوحدي ومفيش حد هيساندني من اللاعبات لأن فيهم لاعبات خايفين من عقوبات الاتحاد وفيهم لاعبات عندهم طموح بتولي منصب في اتحاد كرة اليد فطبيعي أنهم يسكتوا.
4. الكابتن سيف زاهر والكابتن شوبير شغالين تقطيع وهجوم على رحاب جمعة وحابين يصدروا صورة سلبية للناس عني من دون منحي حق الرد.
5.أخيرا انا وصلت رسالتي لمعالي وزير الرياضة والمسؤولين في الاتحاد المصري لكرة اليد والقرار لهم.
6، الكابتن كريم إبراهيم ضيف كابتن شوبير في الحلقة: بشكرك جدًا لأنك قلت مفيش منتخب أول للسيدات وقلت لازم نهتم بكرة اليد النسائية وحابة أقول لحضرتك أنا مش بهدد بالتجنيس عشان أهدد بلدي، بالعكس دي حقيقة وفي عروض ليا لحد دلوقتي لكن أنا عايزة ألعب باسم مصر وهموت وأرجع ألبس تي شيرت منتخبنا، لكني هختلف مع حضرتك وأقولك إن عندنا لاعبات متميزات نقدر نبني بيهم منتخب لأن حضرتك قلت المنتخب هيكون فيه رحاب ومروة وانا حابة اقول لحضرتك عندنا جيل صغير لعب كأس عالم للسيدات وخامة ممتازة وقادرات على اللعب في المنتخب الأول وتقديم أفضل عروض.
عارفة إن كلامي عن تشكيل منتخب أول للسيدات هيعمل مشاكل وهيزعج ناس كتير
وواثقة إن ربنا معايا ومش هيخذلني، يمكن ربنا منح بعض الإعلاميين فرصة يتحدثوا لملايين المشاهدين لكن أنا واثقة إن صفحتي البسيطة دي هتوصل الصورة الصحيحة عني وعن مطالب لاعبات مصر العادلة.
ربنا يحفظ بلادنا من كل شر
"الحق دايما صوته أعلى"
تابعوا آخر أهل مصر على Google News
