" قالولي معلش يا بنتي اعذريهم الجو كان حر وعندهم ضغط شغل كبير" بهذه الكلمات بدأت صدمة الطالبة منة إبراهيم إبراهيم بالصف الثالث الثانوي عام 2019 عندما توجهت لإحدى لجان تظلمات الثانوية العامة 2019 لتقديم تظلم في مدرسة الخديوية الثانوية بالسيدة زينب.
وتروي منة لـ"أهل مصر" قصة يومها مع لجان تظلمات الثانوية العامة 2019 قائلة:"بدأت صدمتي يوم النتيجة لما عرفت النتيجة اللي أنا متأكدة أنها مش نتيجتي لأني تعبت جدا في المذاكرة والدروس والسهر كله ده مجهود غير المجهود الذهني والعصبي اللى كان بيموتنا حرفيا، ولكن صدمتي الأكبر واللى لحد دلوقتي مش مصدقاها لما دخلت اللجنة وبدأت بمادة الفيزياء اللى إجاباتي كانت نموذجية زي نموذج الإجابة اللى معايا ومش واخده عليها حتى نص درجة لا ده أنا واخده غلط يعني صفر، ونقطة أصلا أنا مجاوبتهاش ولقيت نفسي واخده نص الدرجه فيها طب إزاي، وبعدها مادة الفيزياء اللى لقيت ليا 35 درجة ومش محسوبين ده غير إن تجميعة الدرجات أصلا غلط بمعنى الدرجات بتاعت الأسئلة غير اللى مكتوبة بره كراسة الإجابة، وبعدها مادة الإنجليزي اللى كل حاجه عندي طلعت صح وخصوصاً القصه عندي كلها صح في ماعدا نقطتين في الاختياري هما اللى غلط أنا واخدها غلط على القصة كلها، والقطعه إجاباتي كلها صح وبردو معمولي عليها كلها غلط، واختتمت كلامها بانهيار يعني إيه مراقب دلوقتي من مراقبين لجان التظلمات يقولي كده بالحرف "معلش يا بنتي لازم بردو تراعي أنهم كانو عندهم ضغط شغل والجو كان حر عليهم".
وعلى نفس الرصيف الذي شهد دموع وانهيار الكثير من الطلاب الذين ظلموا فى نتيجة الثانوية العامة 2019 وجاءوا لتقديم التظلمات أعربت الطالبة أسماء ربيع أبو العلا لـ"أهل مصر" عن غضبها واستيائها مما شعرت به من ظلم في نتيجة الثانوية العامة قائلة :" حرام عليهم ضيعوا مستقبلي أنا كنت علمي علوم وكنت شبه معتكفة مش بعمل حاجه فى حياتي غير اني كنت بروح دروسي وأذاكر وبس، هما حتى مش عارفين يجمعوا الدرجات الظلمة اللى بيكتبوها بطريقة عشوائية، يعني إيه درجات فى الأسئلة 18 درجة يكتبوهالي على كراسة الإجابة 8 ولما أراجع إجاباتي تطلع نموذجية زي ما الوزارة عايزاها بالظبط وأكتشف إن ليا زيادة عن 15 درجة مش واخداهم وده بس في مادة الفيزياء، لكن مادة الجيولوجيا لقيت ليا أكتر من 26 درجة طب هي الدرجات دى كلها اللى هي حقنا ليه مش بناخدها وليه نسمع أعذار ولازم نلتمس للمصححين 100 عذر وعذر وهما حتى مش بيلتمسوا لينا عذر واحد، ولا حتى بيعملوا حساب إن مستقبل ابن من ولاد البلد ده بيضيع هو والعيلة كلها مش فرد واحد، حرام عليكوا الدرجات دى كلها تضيع علينا وتدمروا نفسيتنا كده وتضيعونا علينا سنه كامله من حياتنا".
ويتحدث الطالب أحمد محمود محمد بحسره وقهر بعد ضياع حلمه الذي حصل على تعاطف كل أولياء الأمور الذين يعرفونه معرفة تامة وشهدوا بتفوقه ونجاحه، لتغلبه دموعه وتنهمر قائلاً:" طول عمري بطلع من الأوائل وكنت بحلم أدخل هندسة ليه أسقط فى الفيزياء وأدخل دلوقتي ملاقيش عندي ولا غلطه وكل إجاباتي صح ونموذجية ومع ذلك أتساوى باللى مذاكرش ولا يعرف أى حاجه عن الفيزياء، ده غير الإنجليزي اللى مطلعش عندي غير كام غلطه ميكملوش 7 درجات بالظبط ليه أسقط فالمادة كلها، حرام عليكم الظلم ده، ربنا عالم ومطلع أكيد ربنا هيرد الحق لأصحابه".
اقرأ أيضاً:"التعليم: حصيلة رسوم تظلمات الثانوية العامة تتعدى 26 مليون جنيه
وقال خالد عبد الحكم مدير عام الادارة العامة للامتحانات ونائب رئيس عام امتحانات الثانوية العامة بوزارة التربية والتعليم، أن هناك نزاهة كبيرة في أعمال التظلمات، مشيرًا إلى أنه إذا ثبت حق الطالب في تعديل درجاته بالزيادة يتم فورًا إخطار الطالب على محل سكنه بموجب خطاب مسجل بعلم الوصول بهذا التعديل.
وأضاف قائلًا : تتولى وزارة التربية والتعليم والتعليم الفني (الإدارة العامة للامتحانات) اتخاذ إجراءات إخطار وزارة التعليم العالي والبحث العلمي (مكتب تنسيق القبول بالجامعات) بنتيجة الطالب/ الطالبة بعد تعديل درجات المادة أو المواد المتظلم فيها بحيث يتم عمل التنسيق على هذا الأساس.
وأشار عبدالحكم إلى أنه من حق الطالب بعد الاطلاع على صورة ورقة إجابته المتظلم منها، أن يدون ملاحظاته في الإطار التالي : وجود أجزاء من الإجابة غير مقدرة ، عدم صحة جمع جزئيات درجات كل سؤال من الداخل، أو عدم مطابقتها للدرجات المدونة على المرآة الخارجية لكراسة الإجابة، الخطأ فى جمع الدرجات الكلية للأسئلة على المرآة الخارجية لكراسة الإجابة، ويحق للطالب تدوين أي ملاحظات أخرى بخلاف ما سبق ذكره إذا ما رأى الطالب أنها ذات تأثير على مجموع درجاته بالمادة المتظلم من درجاتها.
وكانت قد بدأت تظلمات الثانوية العامة للعام 2019 اعتبارًا من يوم الثلاثاء الموافق 16/7/2019، ومن المقرر أن يستمر باب التظلمات مفتوحًا لمدة 30 يوما من هذا التاريخ، وبلغت عدد التظلمات التي تلقتها الوزارة حتى الآن 99 ألف تظلم.
تابعوا آخر أهل مصر على Google News
