من ورشة "سكريبت خانه" لـ تامر فرج.. تعرف على تفاصيل مسلسل "ونسني"

كشف الفنان تامر فرج، تفاصيل مسلسل ونسني، المقرر عرضه في رمضان 2020، على شاشة MBC مصر، ويعد هو أول مسلسل من كتابة ورشة "سكريبت خانه"، أول ناتج لمشروعه الذي كان يحلم به.

وكتب تامر فرج، عبر حسابه الشخصي بموقع التواصل الإجتماعي فيسبوك: "بسم الله توكلنا على الله...هتستمتعوا باذن الله السنه دى رمضان ٢٠٢٠ على اول مسلسل من كتابة ورشة "سكريبت خانه" وهو مسلسل "ونسنى" على قناة MBC مصر من بطولة الشباب المبدعين حازم إيهاب، احمد سلطان، سارة الدرزاوى، بسنت شوقى، سامى مغاورى، حنان سليمان، عبير منير".

وتابع: "وشرفنا فى الحلقات ضيوف شرف عظماء منهم حبيبى وابويا الفنان صلاح عبدالله والعظيمه سوسن بدر واخويا الصغنن Eslam Ebraheem إسلام إبراهيم، من إنتاج شركة فاين ارت المهندس عادل المغربى، وماكانش العمل ده هيكمل بالجمال اللى انا شايفه وان شاءالله انتوا كمان هتشوفوه الا بوجود رؤية المخرج الرائع رامى رزق الله، فى تانى تعاون بينا بعد مسلسل طلعت روحى بس المره دى شغلى معاه ككاتب وهطلع فى حلقه ضيف شرف".

وأضاف "فرج": "المعلومات دى كلها مهمه لكن الاهم بالنسبه لى انكوا تعرفوا ان العمل ده هو اول وليد لورشة سكريبت خانه الحلم اللى كان عندى من زمان والمشروع الكبير اللى بدأت اولى خطواته بتكوين ورشة كتابه من مبدعين شباب هما: احمد خيرى،

عمر كنتاكي، عمر ايمن، وانضملنا المشاكسه هبة العفيفي، والموهوب عبد الرحمن جاويش، الشباب دول جمعتهم من سنه ونص على حلم تكوين كيان اسمه سكريبت خانه مش مجرد ورشة كتابه انما مشروع كبير لمصنع سيناريوهات وافكار فى كل فنون الدراما بحيث ان صناع الاعمال مش هيدوروا مين بيعرف يكتب كوميدي ولا اكشن ولا رعب ولا ..ولا.. هيجوا سكريبت خانه وهيلاقوا اللى هما عايزينه..وهنكبر المشروع لغاية ما يبقى فيه كمان ورش لتعليم الكتابه والتمثيل".

ثم قال: "الشباب دول جأوا على حلم وشغف وتعبوا واشتغلوا واتعلموا من غير ما يكون فيه مشروع او مسلسل او فلوس لمدة سنه ونص لغاية لما ربنا اكرمنا بمسلسل ونسنى واصبح عندنا خطوه فى طريق الالف ميل، وربنا اكرمنا بالكاتب المبدع محمد فوزى اللى بلور التجربه بتاعتنا وخلاها تظهر بالمظهر الاحترافي الدرامى المحبوك اللى هتشوفوه ان شاء الله".

وإختتم حديثه: "ارجوا انكم تتابعوا مسلسل ونسنى على شاشة MBC مصر ومنصة shahid عشان تستمتعوا وتقدروا مجهود أربعة شهور لاعضاء ورشة سكريبت خانه كما ارجوا من اصدقائى الصحفيين على صفحتى نشر البوست ده فى اخبارهم الفنيه لتقدير عمل الشباب دول واضمن لكم انكم هتستمتعوا بحاجه جميله وكوميديا جديده مختلفه، اسف على الإطالة بس لازم كل واحد كان ياخد حقه ويفرح بنجاحه .... رمضان كريم .. وكل سنه وانتم طيبين".