إلهام شاهين عن دورها في "حظر تجوال": "ميفرقش معايا أطلع أم أو ست"

أكدت الفنانة الكبيرة إلهام شاهين أن اختيارها لفيلم حظر تجول، جاء بعد فيلمها رقم 100 في مسيرتها الفنية "يوم للستات".

تابعت في لقاء خاص عبر برنامج "كلمة أخيرة" الذي تقدمه الاعلامية لميس الحديدي على شاشة "ON"، قائلة: من وأنا صغيرة كانوا يقولولي نفسك في إيه؟ كنت أقول نفسي أعمل 100 فيلم وكنت حاسة إنها حاجة بعيدة جداً وقتها لكن بعد أن نجحت وقمت بعمل 100 فيلم وأنا صغيرة .. توقفت وقلت لنفسي هعمل إيه تاني؟ لأني عشت كل المواقف الي ممكن تتعاش في بطولات فنية في 100 فيلم بالاضافة لانتاجي من المسرحيات والمسلسلات".

وتابعت: "قلت لنفسي هعمل إيه تاني ؟ خاصة وأنا مش بحب اكرر من نفسي كتير واقلل من نفسي وعشان أنا مجنونة سينما وفن مكنش من الساهل الاقي حاجة جديدة".

وواصلت "حظر تجول وقبل قراءة السيناريو وقبل أنا لازالت أقرا في المشهد الاول وجدت أن القصة تدور حول سيدة قضت نحو 20 عاماً في السجن فقررت وقتها أن اقوم بالفيلم دون قراءة بقية الأحداث.. وقلت لنفسي وقتها لسه فيه حاجة الواحد ممكن يعملها رغم أنه عمل 100 فيلم".

وحول طبيعة دورها وقبولها بدور سيدة كبيرة السن في الفيلم قالت "عمري مافكرت أختار أدواري بالسن طول عمري بعمل أدوار كتيرة بتبقى أكبر من سني فيه فنانات بتحب تبقى أصغر من سنهم لكن أنا بحب أعمل أكبرفي السن وهذا بالنسبة لي تحدي خاصة أني فنانة مش معتمدة على شكلها ولا عشان هي حلوة ولا عاملة شعرها في الكوافير أنا بس بحب التمثيل وأنا ممثلة".

وأردفت "ماعنديش ثقة في نفسي في اي عناصر أخرى غير أن أنا ممثلة فقط مش مهم أظهر بشكل إيه ولا سن إيه ؟ وأنا بعتز بده جداً ..طول عمري بعمل أدوار يخافوا منها النجمات فمش بخاف اطلع قبيحة في دور ولا أكبر من سني وأنا طلعت في دور أم لناس قريبين مني في السن زي اشرف عبد الباقي وعمرو سعد وهشام سليم".

وأتمت قائلة: "لا أعتمد على شكل أو مظهر أو لبس ولا سن بعتمد فقط على الأداء ممثلة فقط".