علق اليوتيوبر أحمد حسن، منذ قليل، على أزمة احتراق سيارته؛ وذلك عبر صفحته الرسمية على موقع التواصل الاجتماعي فيسبوك.
ونشر أحمد حسن مقطع فيديو من احتراق سيارته وعلق قائلا: 'الحمد لله على كل شيء، أولا أنا مش زعلان من اللى حصل لأن فى الأول والآخر قضاء و قدر وبحمد ربنا انى خرجت من العربية أنا ومراتى وبنتى سالمين غانمين لأنى كل ما بشوف منظر العربية بعد ما اتحرقت وأتخيل أن احنا لو كنا جواها وملحقناش نخرج منها قبل ما تتحرق كان هيحصل لنا ايه قلبى بيوجعنى جدا'.
وتابع أحمد حسن: 'اللى حصل بالضبط كالتالى.. كنت راكب العربية أنا وزوجتى وبنتى ورايحين مشوار بليل، فجأة بدون أى مقدمات العربية تطلع دخان وعربية ماشية جنبنا تنبهنا بده، فروحنا نازلين بسرعة من العربية وبعدت مراتى وبنتى بعيد عن العربية وفجأة قبل ما أوصل للعربية تانى عشان أجيب متعلقاتنا الموجودة فى العربية ألاقيها بتولع حاولنا نطفيها كتير لكن كل مكنا بنحاول نطفيها بالطفايات بتاعت الحريق النار كانت بتزيد أكتر لحد ما العربية تفحمت بالكامل مع العلم أن العربية لسه مشتريها من ٥ شهور بس وموديل ٢٠٢٠ وماشية ١٠ آلاف كيلو بس ومش من شركة أى كلام، دى عربية مرسيدس cla 200 وتولع بينا واحنا ماشين فى الطريق انتوا متخيلين'.
وأضاف: 'الشركات دى بتستهر باروحنا ازاى رغم انهم بيدعوا انهم بيحافظوا عليها بوسائل الأمان اللى بتكون فى العربية ومع العلم أيضا انى وصلتني رسايل كتير من كذا شخص استخدم نفس الموديل ده من مرسيدس وحصلت معاه نفس المشكلة بالظبط انتوا ازاى بتلعبوا بأرواحنا كده، وبعد مشوفت ان العربية ضاعت منى خلاص وبقالها أكتر من نص ساعة النار مشتعلة فيها وبعد متوصلنا مع المطافى وقالوا أنهم فى الطريق وحاولنا كتير اننا نطفى العربية وكانت بتزيد أكتر والنار بتكون أشد قررت اطلع لايف وأوثق اللى بيحصل ده وإن ازاى شركة بحجم مرسيدس تكون بتستهر بأرواح عملائها بالشكل ده وده اللايف اللى شوفتوه'.
واكمل: 'دلوقتى أنا عايز حقى أنا واحد طلع عينى سنين وحرمت نفسى من حاجات كتير عشان أشترى العربية دى وبعد ما اجيبها متكملش معايا ١٠ آلاف كيلو وتولع لوحدها فيبقا لازم أطالب بحقى وفى ناس كتير بتبعتلى بتقولى انت زعلان ليه دى مجرد عربية، لأ حضرتك لازم أزعل لأن دى بالنسبالى مش مجرد عربية دى حلم وتعبت كتير عشان أحققه وبعد ما حققته راح منى بسبب شركة مستهترة، حضرتك لو اشتريت موبيل والشاشة بتاعته طقت لوحدها واتشرخت منك تانى يوم هتكون حزين جدا وهتروح تبهدل الشركة اللى اشتريت منها التليفون ما بالك بقا باللى حصل معايا.
واختتم: 'حسبى الله ونعم الوكيل وأنا مش عايز حاجة غير حقى ياريت تقفوا جنبى لأننا لو كنا جوا العربية لسه والراجل المحترم اللى نبهنا اننا ننزل من العربية مكنش خد باله من الدخان كان زمانكوا دلوقتى حاطين صورنا وبتترحموا علينا والحمد لله مرة تانية اننا خرجنا منها بخير وبنتى ومراتى بصحة جيدة.. مرسيدس بتستهر بأرواحنا.. عايز حقى'.
تابعوا آخر أهل مصر على Google News
