رحمة حسن تهاجم المنتج هاني أسامة: بقالي 3 سنين مش عارفة أجيب حقي

نشرت الفنانة رحمة حسن شكوتها بخصوص مستحقاتها المالية التي تملكها عند المنتج هاني أسامة منذ عام 2017.

أزمة رحمة حسن مع هاني أسامة

وكتبت حسن، عبر موقع تبادل الصور والفيديوهات 'إنستجرام'، قائلة: 'أولا كل الاحترام والتقدير للدكتور أشرف زكي.. على استجابته وسؤاله، وأحب أوضح أن الفلوس اللي ليا عند هاني أسامة المنتج هى باقي أجري عن مسلسل 'سابع جار'، وكان ليا جزء كبير منها، ولجأت للدكتور أشرف في ٢٠١٩ علشان يساعدني، وحصل واداني جزء بسيط من فلوسي، وللعلم الوقت ده كان بابا تعبان وفي المستشفى وهاني أسامة كان عارف وقلتله اني محتاجه الفلوس أرجوك ورفض بعدها يديني أي فلوس من باقي أجري ومكانش بيرد على رسائل أو مكالمات مني'.

وتابعت: ' للأسف بابا اتوفي بعدها بكام يوم ومن ساعتها وأنا تعبانة ومش ناسية هو عمل معايا ايه، وكان صعب عليه أني اطلب تاني من دكتور أشرف أنه يتدخل لأن هاني مش بيستجيب أصلا وأنا كنت تعبت من كتر ما بطلب حقي وهاني بيتهرب، بس بين كل فترة والتانية كنت ببعتله رسالة أو أكلمه وبرضوا مفيش حاجة كل ده بمنتهى الذوق والاحترام والرسائل موجوده معايا من ٢٠١٨ كله على التليفون، وطبعا الوقت بيعدي وأنا معنديش شغل أو دخل وتعبت وبعتله تاني من كام يوم وقلتله وبرضوا مفيش حاجة وكمان العقد بتاعي معايا ومخصوم منه الضرائب اللي دائما بدفعها على أي عمل بشارك فيه من زمان'.

وأضاف حسن: 'العقد بتاعي على مسلسل ٦٠ حلقة.. هاني صور وذاع ٦٧ حلقة يعني ليا كمان 7 حلقات مش موجودين في عقدي وماخدتش عليهم كمان أجر ومطلبتش بيهم أصلا بس هو عارف، الفكرة أنه طلع أن في كذا شخص في الشغل مش أنا بس، عندهم نفس الموقف مع هاني، ويمكن بفلوس أكتر بكتير، وفي نفس الموضوع والنقابات والقضية وما إلى ذلك.

واختتمت منشورها عبر إنستجرام: ' أما بخصوص أن الدكتور أشرف طلب مني أني أروحله النقابة عشان نتكلم في الموضوع، أنا قلتله أني مش عايزة اتعبه أكتر من كدا معايا، خصوصا أني عارفة أني مش نقابية واني بشتغل بتصاريح ومش عايزة أضيع وقته خصوصا أنه ساعدني قبل كدا، وكمان عشان عارفه أن هاني مش بيستجيب عشان هو منتج يتبع نقابه تانية، وكنت عارفة أن الدكتور أشرف كلمه قبل كدا في موضوع الفلوس ده وبرضوه محصلش حاجة.. يعني لو كان عايز يدفع كان دفع من زمان، المسلسل اتذاع وخلص وهاني عمل بعده كذا عمل.. أنا قلت للدكتور أشرف أني مش هقدر أجي لأني تعبانة وأني مش هشيل البوست لحد ما أخد فلوسي لأني بحاول أجيب حقي اللي بقالي ٣ سنين مش عارفه أجيبه'.

فيلم سابع جار

تدور الأحداث بين عدد من الجيران العائشين داخل إحدى العمارات السكنية، ومعظمهم من الطبقة المتوسطة، حيث يتعرض المسلسل لكيفية عيش هؤلاء السكان داخل شققهم وخارجها، حيث يواجه كلًا منهم مشاكل حياتية واجتماعية، لكن هذه المشاكل لا يعرفها جيرانه الآخرين، على الرغم من أن هذه المشاكل كبيرة معقدة، والمسلسل من إخراج أيتن أمين وتأليف هبة يسري، وبطولة الفنانين دلال عبدالعزيز، شيرين، أسامة عباس، هاني عادل، نيقولا معوض، هيدي كرم، رحمة حسن، محمود علاء.