ياسمين عبد العزيز عن مرضها:"حطوني على جهاز في العناية لو دخلوه 100 بيطلع منهم 10 أحياء"

تحدثت النجمة ياسمين عبد العزيز عن تفاصيل المحنة الصحية الصعبة التي مرت بها مؤخرا، وذلك في لقائها التي تطل به لأول مرة على جمهورها برفقة الإعلامية منى الشاذلي ببرنامج 'معكم'، المذاع عبر قناة 'CBC'.

وقالت ياسمين عبد العزيز:'في العناية قعدت 5 أيام كنت خلاص اللي بيدخلوا شايفين اني بروح، الدكاترة قالوا ادعولها تعيش اليوم بيومه.. الجهاز بتاع العناية اللي حطوني عليه لو 100 بيدخلوا عليه مش بيطلع منهم غير 10.. حتى بعد ما خفيت كان فيه حد قالي إن حد قاله من العيادة اللي بيدخل على الجهاز ده مش بيطلع.. وكانت نبضات قلبي ضعيفة وتلوث لسه في الدم عالي'.

وتابعت: 'من أول العملية الأولانية لغاية العناية المركزة في وقت كده كنت شبه غيبوبة مش فاكرة حاجة بس فيه وقت كدة، ولا بتكلم ولا بمشي ولا باكل ولا بقعد.. صريخي كان جايب آخر المستشفى.. وأنا في العناية كان فيه حاجة غريبة أوي 4 أيام أو 5 مش فاكرة حاجة.. ومكنش بسأل أوي عشان مش عايزة افتكر الأيام دي بسأل بس عن ايه حصلي في بطني'.

ومرت الفنانة ياسمين عبد العزيز مؤخرا بأزمة صحية شديدة بعدما خضعت لعملية، وتعرضت لخطأ طبي أدى إلى تدهور وضعها الصحي، قبل أن تسافر إلى سويسرا لاستكمال رحلة علاجها، ثم إعلانها في شهر سبتمبر الماضي عن تعافيها من مرضها.