عمرو أديب:"اللي بيتعمل في منى زكي وأحمد حلمي حرام.. انتوا ليه بياعين" (فيديو)

علق الإعلامي عمرو أديب عن الفنانة منى زكي والفنان أحمد حلمي، بعد موجة الانتقادات التي طالتهما بسبب فيلم أصحاب ولا أعز، بعد عرضه على منصة 'نيتفليكس'.

وقال عمرو أديب، خلال تقديمه برنامجه 'الحكاية' المذاع عبر قناة 'ام بي سي مصر':'اللي بيتعمل في أحمد حلمي ومنى زكي حرام، إنت عندك مشكلة مع مبدأ وفيلم، حياة الاثنين الشخصية يتعمل فيها كده ليه، ده أحمد حلمي اللي إنتو بتحبوه، ودي منى زكي اللي إنتو بتحبوها. إنتو ليه بياعين وفجأة نسيتوا دول مين، وناس تقول هيطلقها، يطلقها ليه! لو عندك مشكلة مع الفيلم أو تمثيل منى زكي أحمد حلمي ماله.'

وأضاف: 'إزاي في ساعتين ثلاثة تتجردوا من كل الإنسانية وتقطعوا الناس كده، وليه الراجل يتهزأ والست تتبهدل كده؟ دول عندهم عيال. والغريب إن في صمت ما، نسيبهم يتقطعوا ويتنهشوا في الشارع، هما مش الناس دول أسعدوكم بفنهم وتعبوا وعاشوا معاكم؟ دي منى زكي صباعها مبانش في الفيلم.'

وتابع: 'في حاجات في الفيلم ممكن لا أتفق معاها، لكن الأفكار تتناقش بأفكار مش بجريمة وإننا نذبح الناس. هاشتاج مصر 6 تريندات 4 منهم شتيمة في منى زكي وأحمد حلمي، ازاي يتعمل فيهم كده؟'.

وتابع: 'يا جماعة ناقشوا الفيلم، شايف الفيلم جريء زيادة عن اللزوم ومش من مبادئنا إدعي لمقاطعة الفيلم. لكن إنت تعرف إيه عن إيمان أحمد حلمي ومنى زكي، وربنا هيحاسبهم إزاي، خلاص كلنا نصبنا نفسنا حكام وقضاة وآلهة، وبعدين إنتو ضد الجرأة والأباحة، فتشتموا الناس بإباحة وجرأة، إيه النفاق ده عيب.'

وكان قد أثار فيلم أصحاب ولا أعز، جدلاً كبيراً، بعد عرضه مؤخراً عبر منصة «نتفلكس»، لما يحتويه من مشاهد جريئة وألفاظ خادشة لا تتناسب مع المجتمع العربي الإسلامي، والفيلم من بطولة منى زكي وإياد نصار ونادين لبكي.

ويعتبر فيلم أصحاب ولا أعز، النسخة العربية من الفيلم العالمي الايطالي الشهير Perfect Strangers، الذي حقق أرقاما قياسية في عدد مرات النسخ حول العالم بإجمالي 18 نسخة حول العالم، ليصبح فيلم أصحاب ولا أعز النسخة رقم 19.

وتدور فكرة فيلم أصحاب ولا أعز في قالب درامي تشويق، حول حدوث خسوف كلي للقمر، والتقاء عدد من الأصدقاء لرؤية هذه الظاهرة، وأثناء سهرتهم يلجأون إلى لعبة تتسبب في اكتشاف العديد من الأسرار، ليشعروا أن القمر له تأثيره عليهم وعلى ما حدث بينهم في فيلم أصحاب ولا أعز.