إلهام شاهين تكشف كواليس آخر زيارة لسمير صبرى: قلبه كان حاسس (خاص)

روت الفنانة إلهام شاهين، كواليس آخر زيارة لها للفنان سمير صبري، عندما كان يمكث في إحدى المستشفيات على إثر الوعكة الصحية التي عانى منها مؤخرا.

وقالت إلهام شاهين في تصريح لأهل مصر:"سمير في المستشفي لما كان يشوف أي حد من زمايله تحس أن هو بيودعه ومش عايزنا نمشي، يعني في آخر زيارة ليه سبناه وقمنا خرجنا لحد الاسانسير.. كنا تلاتة وقتها فاكرة كنت أنا وميرفت أمين ودنيا سمير غانم، بعد مخرجنا للاسانسير لقينا حد جاي من عند سمير بيقول أنه عايزنا نرجع تاني".

وإضافت شاهين قائلة:"فرجعنا قال انتوا استعجلتوا ليه خليكوا قاعدين معايا، قلنا له إحنا خايفين نبقى تاعبينك تكون عايز تنام أو ترتاح، قال لا اقعدو معايا عايز أشبع منكوا، قعدنا طبعا معاه زي ماهو عايز، وفي الآخر واحنا خارجين قلتلهم خدتوا بالكم من جملة عايزة أشبع منكوا".

وتابعت:"سمير كان قلبه حاسس وكان عارف حالته طبعا، وأحنا كنا عارفين بس برضه الفراق في كل الحالات بيبقى صعب أيا كان، الله يرحمه كان فنان جميل وموسوعة وإنسان أجمل وأجمل".

ورحل الفنان الكبير سمير صبري عن دنيانا اليوم الجمعة عن عمر يناهز 85 عاما، ويشيع جثمانه غدا السبت، من مسجد الشرطة بمدينة الشيخ زايد بعد صلاة الظهر والدفن بالمنارة بالإسكندرية.