هند عاكف: طول مانا موجودة محدش هيعمل السيرة الذاتية لنعيمة عاكف غيري

أرجعت الفنانة هند عاكف سبب غيابها منذ فترة عن التمثيل، بسبب ضعف الأعمال التي تعرض عليها من قبل المنتجين خلال الفترة الماضية.

وأضافت هند عاكف في تصريح لـ أهل مصر:'بعدت شوية واتجهت لمجال آخر ورجعت للفن والجمهور اللي بحبه، منتظرة العمل اللي يقدمني لجمهوري بشكل جيد.. لو المنتجين والمخرجين بعته شغل حلو هعمله'.

وتابعت:'الجمهور على مواقع التواصل يطالبوني بعمل السيرة الذاتية لعمتي الفنانة الكبيرة نعيمة عاكف، بشكركم على الكلام ده، أتمنى ده طبعا لو اتعرض عليا ليه لا أنا استعراضية وعمتي استعراضية وفينا دم كتير ومش هقول الشبه لأن فيه ناس تقول شبهها وناس لا'.

وعن تعويض مكانتها قالت:'محدش يقدر يعوض مكانة نعيمة عاكف و لا حتى أنا لو علمت السيرة الذاتية لها مش هقدر أعوضها.. هحاول أقرب من صورتها لكن عمري أبدا ما هبقى زيها ولا اي حد هيعوض نعيمة عاكف ملكة الاستعراض ومعبودة الجماهير'.

وعن ترشيحها لفنانة أخرى لتجسيد شخصية نعيمة عاكف علقت مازحة:'مرشحش حد حتى لو فيه حد يصلح أعتبرها بقى تحيز اي حاجة عمتي وأنا حرة فيها طول منا موجودة مش هتتعمل السيرة الذاتية بتمنى ربنا يوفقني وأعملها والله'، وعادت وقالت:'لو فيه حد أحسن مني يعملها'.

وعن أهم مميزات نعيمة عاكف قالت:'كانت تتميز بخفة الدم وحبها لعلمها وأدائها المميز، وتطوير نفسها في كل دور وأستعراض.. وكانت انسانة جدا وتحب أهلها وبارة بهم جدا وشخصيتها قوية وعصبية جدا وطيبة جدا في نفس الوقت وبتنسى في لحظة.. والميزة دي أنا ورثتها عنها جينات الله أعلم'.