كشف الفنان محمد حماقي، عن أنه لا يحاول مقاومة البكاء وإخفاءه إذا تأثر بموقف ما بدرجة كافية، كما حدث في كواليس برنامج 'ذا فويس'.
حماقي: بكيت بسبب أحلام
وقال محمد حماقي، في الجزء الثاني من لقائه مع الفنانة إسعاد يونس ببرنامج 'صاحبة السعادة' المذاع على قناة 'دي إم سي': 'أنا بكيت بسبب أحلام، إحنا في البرنامج بنبقى مش عارفين مين ورانا، وفي صوت حلو غنى، ولما لفيت لقيتها على كرسي متحرك'.
وأضاف محمد حماقي: 'طبيعي إني أشوف حد بيغني على كرسي متحرك لكن مكنتش متوقع، وقعدت على الأرض في المسرح لحد ما تخلص غنا، وبعدين إحنا الأربعة رحنا لها واختارتني'.
وأوضح حماقي أنه بقي في حالة تأثر بعد اصطحاب المتسابقة إلى خارج المسرح قائلا: 'فضلت في الاستراحة مش مظبوط وعلى شعرة، وقعدت جنبي أحلام وحست بتأثري، وأول ما قامت عشان تطبطب عليا بكيت، لدرجة إننا وقفنا شوية ومكنتش قادر أسكت، وحتى لما خرجوني فضلت مش عارف أسكت، ورجعت عينيا منفوخة'.
كواليس بداياته في مجال الغناء
وتحدث حماقي، خلال الجزء الأول من اللقاء الخاص بمناسبة رأس السنة، عن كواليس بداياته في مجال الغناء قبل 20 عاما، موضحا أنه في طفولته كان يتخيل نفسه ضمن مجموعة المطربين المشاركة في ألبوم 'لقاء النجوم' وقتها.
وأضاف حماقي أن هذا الألبوم 'لقاء النجوم 1' صدر في عام 1989، والثاني في 1990، ومن الطبيعي أن يستمر كل عام حتى تنتهي السلسلة، ووقتها كان لا يزال طالبا في المدرسة لكنه تمنى لو كان ضمن مطربي الألبوم.
وتابع: 'في سنة 1991 كنت في المدرسة وجبت ورقة ورسمت كأنه بوستر الألبوم وكتبت (لقاء النجوم 3) وحطيت اسمي معاهم.. وقتها كان الطبيعي إن كان بيبقى الألبوم كل سنة.. لكن لقاء النجوم قعد متعطل 8 سنين مبينزلش.. ثم لقاء النجوم 3 في 1998 أنا غنيت فيه'.
وأردف: 'أنا اتخضيت لما كلموني.. لأن وقتها افتكرت اللي أنا رسمته ده وطارق أخويا افتكر كمان... من هنا عرفت إن إيمانك الشديد بشيء بيخليه يتحقق.. اللي هي فكرة الطاقة إن أنت تقدر تحرك الحاجات لصالحك من شدة إيمانك بيها.. لو أنا أجمل صوت في العالم ومش مصدق إني مغني كويس عمري ما هبقى مغني كويس'.
تابعوا آخر أهل مصر على Google News
