محمد حماقي: "ما بلاش" تحكي تفاصيل لقائي الأخير بوالدي

كشف الفنان محمد حماقي، عن كواليس وقصة أغنية 'ما بلاش'، التي صورها عقب وفاة والده عام 2014.

قصة أغنية 'ما بلاش'

وقال محمد حماقي، خلال الجزء الثاني من لقائه مع الفنانة إسعاد يونس في برنامج 'صاحبة السعادة' المذاع على قناة 'دي إم سي'، إن البعض ربط بين طرح الأغنية وعودته لزوجته بعد فترة انفصالهما موضحا: 'إحنا انفصلنا سنتين، ووقت نزول الأغنية كنا رجعنا لبعض بدون إعلان، والناس ربطت بين الأغنية ورجوعنا لأن الكليب فيه شكر لنهلة زوجتي'.

حماقي: 'مابلاش' تحكي تفاصيل اللقاء الأخير بوالدي

واستعاد حماقي تفاصيل لقائه الأخير بوالده قائلا: 'آخر يوم كنا مع بعض كان في فرح بنت خالي، وكان مزاجه حلو ومنطلق وبيتحرك بين الطرابيزات بيسلم ويرحب ويهزر مع كل الناس، وبعد ما خلصت وقف معايا يهزر مع واحد صاحبي، وطلع من جيبه حاجة حلوة وقال حلي بقك على الغنا الحلو'.

وأضاف محمد حماقي: 'بعد ما سلم عليا ومشي من الفرح، كلمني في التليفون وكانت مش عادته، وروحت بيتي والساعة 9 الصبح وصلني خبر الوفاة، وكانت صدمة كبيرة ومرحلة وحشة'.

وعن ظروف اختيار أغنية 'ما بلاش' تحديدا، قال حماقي: 'كان عندي لحن أخذته من تامر علي قبل وفاة أبويا، وكان كاتب كلمتين عليه (ما بلاش تغيب عنا تاني..ما بلاش يا سايب اراضينا)، وفضلت فترة طويلة قاعد مع أمي في البيت ورافض أنزل أو أعمل حاجة، ويوميا أمير طعيمة كان بيحاول ينزلني من البيت، لغاية بعد أسبوع أو 10 أيام نزلت معاه وسمعته ما بلاش، وطلبت منه يكتبها'.

وأشار محمد حماقي إلى الكوبليه الذي يصف لقاءه الأخير بوالده في الأغنية، وهو:

الحقيقه ان الحياه ضحكت علينا

لا الفراق ولا اللقا كانوا بايدينا

لما يومها حضنتني وبعدين مشينا

ليه مقولتش ان ده الحضن الأخير

كنت سيبني لحد آخر لحظه جنبك

سيبني اقولك قد ايه وازاي بحبك

مهما طال بينا البعاد مش هنسى حبك

واشوفك يوم على خير

وتابع: 'لما جيت أصور الأغنية حبيت أنقل الفكرة بس عملتها بالمقلوب، وطلعت أنا الأب لبنت صغيرة أنا موجود في خيالها، وهي الوحيدة اللي تقدر تشوفني'.