حمو بيكا: أنا مدرسة في المهرجانات.. وحسن شاكوش سقط فنيا

قال مطرب المهرجانات حمو بيكا إن النقيب مصطفى كامل نقيب الموسيقيين على دماغنا من فوق وهو اللي جاب لنا حقنا .

https://youtu.be/iRtzQHLZRro

وتحدث مطرب المهرجانات حمو بيكا خلال حلوله ضيفا عبر برنامج العرافة مع الاعلامية بسمة وهبة قائلا : 'المهرجانات اسمها أغاني وليست مهرجانات ونقيب الموسيقيين لا يرغب في تسميتها مهرجانات'.

واستكمل بيكا قائلا: 'وافقنا على رغبة مصطفي كامل وأصبحنا نطلق على المهرجانات اسم أغاني ولا نشعر بالحزن مطلقا ، مؤكدا أن الأغاني الخاصة بنا لا نطلق عليها أغاني شعبية'.

حديث حمو بيكا عن حسن شاكوش

وعن سؤاله عن حسن شاكوش قال: 'حسن شاكوش مظهرش إلا معايا أنا والناس كانت بتسألني مين ده في بدايات حسن شاكوش وأيضا بيغني الأغاني بتاعتي التي خرجت من الأستوديو الخاص بي'.

وتابع بيكا: 'الناس كلها عارفة مين السبب في ظهور حسن شاكوش للنور قائلا 'أنا المدرسة في المهرجانات ، وأنا أيضا قفلت بنت الجيران لحسن شاكوش وفتحت الأغنية تاني ليه'.

وتابع: 'حسن شاكوش جاب ناس عشان تتوسط لكي أفتح له أغنية بنت الجيران، ولما حسن عمل أغنية معايا في بداياته ونجحت قلتله هنعمل شغل كتير ، وخدت فلوس من ناس عشان نعمل شغل مع بعضنا لكن حسن مجاش وخلف بوعده' .

وإستكمل: 'حسن بيحب السهر ومش بيحب الشغل لكن أنا بتاع شغل وبس ، وحسن وقع فنيا مؤخرا ، وهو مش مشهور أكتر مني ومش محبوب أكتر مني ، مؤكدا 'أنا العالم كله يعرفني'.

رأي بيكا في تصريحات حسن شاكوش

وردا على تصريحات حسن شاكوش عندما قال 'حمو بيكا معاهم معاهم عليهم عليهم بس حمو على المستوى الشخصي غلبان وطيب والناس بتلعب بدماغه وبيلعبو بمشاعره عشان هو طيب ' وقال حمو بيكا: 'شاكوش بيتكبر على الناس وأنا لما أكون غلبان أحسن ما أكون شراني، وحسن مغرور ومتكبر ومحدش بيساعدني في مشواري الفني وأنا المدرسة اللي طلعت حسن شاكوش'.

وتابع: 'مفيش حد يعرف يسوقني في الحياة وأنا مش صغير ، وأنا لما بعمل حاجة بعملها من دماغي ومفيش حد بيقولي أعمل ايه ، وحد صديق لي أسمه ايمن شعبان هو اللي رشحلي حسن عشان يغني مهرجان معايا ومكنتش أعرف حسن شاكوش مطلقا'.

وعن حضوره فرح حسن شاكوش رد قائلا: 'حضرت فرح حسن من البداية للنهاية ، وهو بيقول الناس كلها جاملته ومحدش خد فلوس بس الله أعلم'.