ابنة رجاء الجداوي: أمي اشتغلت في جراج.. وقضيت طفولتها عند تحية كاريوكا

روت أميرة مختار ابنة الفنانة الراحلة رجاء الجداوي، كيف عاشت والدتها ما بين حياة البرنسيسة، ونزولها لسوق العمل، وتحولها لبنت بلد.

وقالت أميرة مختار في لقاء لها ببرنامج 'بالأصول' عبر قناة الشمس: 'ماما عاشت الاتنين، برنسيسة كما ينبغي أن تكون الكلمة، والعصر ده كانت أميرة، بتطلع في الشتاء سويسرا وبتروح في الصيف سويسرا تاني، عشان تلعب بينج بونج، وتروح باريس وترجع، والفترة دي كانت عايشة مع طنط تحية كاريوكا هي وأخوها فاروق'.

وعن سبب عملها في جراج بعد ذلك قالت أميرة: 'هي كانت المفروض هتطلع البعثة بتاعتها في فرنسا لأنها اتكرمت السادسة على القطر المصري، وكرمها دكتور طه حسين لما طلعت بدرجاتها دي، وكان مفروض تكمل في دراستها، وقالت لأ أنا هشتغل لأن أمي محتاجاني، فغيرت حلم طنط تحية والخط اللي كانت رسماه لها، وسكة السفر اللي المفروض توصل آخرها لحاجة، وخرجت برة قضبان القطر، وراحت في اتجاه تاني فدا زعل طنط تحية منها جدا جدا'.

وأضافت: 'لما خرجت برا دا، اشتغلت وطنط تحية قالتها لو عايزة تروحي روحي، أنا مليش دعوة، فراحت وبنت البلد اتولدت داخلها ونزلت لأرض الواقع، واشتغلت في جراج تقبض الكمسارية، وفي نفس الوقت كانت بتشتغل في مكتب ترجمة من الفرنسي للعربي ومن العربي للفرنسي'.