ناقد: عبد الحليم كان هيعمل دور نور الشريف في حبيبي دائما وغيروله النهاية

كشف الناقد الفني إلهامي سمير كواليس فيلم حبيبي دائما، للنجم الراحل نور الشريف، وذلك تزامنا مع ذكرى وفاته التي تحل اليوم.

وكتب إلهامي سمير عبر حسابه الشخصي على موقع فيسبوك: 'ذكرى نور الشريف، سنة 1980 قدم نور الشريف وبوسي واحد من أكتر الافلام الرومانسية فى السينما المصرية شهرة وهو حبيبى دائما..الفيلم ساب اثر فى كتير من الشباب اللى اعتبروا قصة الحب ايقونية ولازم تعيش وتبقى نموذج رغم نهايتها المؤلمة'.

وتابع:'فى ناس قالت إن الفيلم متاخد عن الفيلم الأمريكى قصة حب، لكن الحقيقة أن الفيلم اتعمل عن قصة حقيقية بس مصرية مش أمريكية، وأن يوسف السباعي استوحى الأحداث من قصة كان بطلها عبدالحليم حافظ، والمفاجأة الأكبر أن حليم كان هو اللى هيعمل الدور لكن المشروع باظ بسبب مرضه ثم وفاته'.

تغيير نهاية فيلم حبيبي دائما

واضاف:'فى القصة الحقيقية البطلة اتوفت نتيجة إصابتها بمرض نادر، ومن كتر التعب كان شعرها بيقع وشكلها اتغير بالكامل لكن صناع الفيلم لقوا ان التفاصيل دى ممكن تحبط الجمهور اكتر فقالوا بلاش نظهرها بالشكل ده.. خصوصا وأن نهاية القصة كانت صادمة على غير عادة الافلام المصرية اللى البطل الطيب فيها لازم يتجوز البطلة فى الاخر'.