ناقد فني: علقة وراء انضمام محمود ذو الفقار لفريق التمثيل بمدرسته

روى الناقد الفني إلهامي سمير قصة اعتذار مدرس للفنان والمخرج محمود ذو الفقار، في مرحلة الطفولة.

وكتب إلهامي سمير عبر حسابه بفيسبوك: 'أغلب الممثلين زمان لما اتسألوا عن أول مرة مثلوا فيها، كل واحد فيهم قال إنه أخد علقة محترمة بعد ما أهله اكتشفوا أنه بيمثل، إنما اللي حصل مع محمود ذو الفقار كان العكس'.

وتابع: 'وهو فى المدرسة الابتدائية، وفي يوم من الأيام اضطر محمود ذو الفقار أنه يخرج من الطابور لأمر ملح، وهنا لمحه أستاذ من أستاذته فسمعه كلام مش ولا بد، وفي نهاية الوصلة ضربه، وبما أن محمود كرامته كانت بتنقح عليه، رفض أنه يدخل الفصل إلا لما الأستاذ يعتذر له'.

وأضاف إلهامى سمير: 'بما أن الأستاذ كمان كرامته كانت بتنقح عليه، قال أنا مش هعتذر لعيل صغير، وطلب من محمود أنه يروح ويجيب ولى أمره، فرجع محمود لولي أمره وكان ضابط كبير، ولما عرف اللى جرى لابنه اتصل بوزير المعارف، والوزير اتصل بالناظر، اللي جاب الأستاذ وأجبره أن يعتذر لمحمود، وبقى عايز يعمله أي حاجة علشان يراضيه، وهنا قرر الأستاذ أنه يضم محمود لفريق التمثيل اللي هو مكونه من يومها بدأت رحلة محمود مع التمثيل'.