نشر الفنان تامر حسني عبر حسابه الشخصي على موقع التواصل الاجتماعي «فيسبوك»، رسالة مؤثرة لجمهوره عن الحرب الجارية الآن في فلسطين والأراضي المحتلة.
وكتب تامر حسني عبر حسابه على «فيسبوك»: «في الوقت ده ناس كتير إيمانها بربنا ممكن يتزعزع أو ينهار و يقولوا طب ربنا فين مش هرد بالآيات والأحاديث عشان في ناس أحق مني يتكلموا بلغة الدين بس أنا هرد رد بسيط من واقع الدنيا، أنت لو دخلت فيلم و جالك تليفون فاستعجلت، ومشيت في ربعه الأولاني هل تقدر تحكم على نهاية الفيلم أكيد لأ، يعني متحكمش على حاجة لسه مش خلصانة طب الدنيا لسه شغاله مخلصتش يعني متعرفش بكرا ربنا شايل ايه متستعجلش و تحكم على الدنيا و أنت لسه مشوفتش مرحلة النصر اللي ربنا وعد بيها اصلاً في قرآنه، متحكمش دلوقتي حكمك هيكون غلط أحنا لسه مكملناش الدنيا للآخر».
اللي ماتوا راحوا الجنة
وأضاف تامر حسني: «يمهل ولا يهمل و اللي راحوا دول جريوا على الجنة اللي هي الحياة الأساسية حياة الخلد راحوا دار الحق، ومشيوا من دار الباطل يا جماعة الدنيا دي ولا حاجة دي دار باطل فيها الشر و الكره و الحقد و الظلم، لكن الناس دي راحت لحياة كلها حب، وخير و سلام و فرح و لما في الآخرة نشوف كل حد كانت حياته صعبة و مليانة معاناة ازاي ربنا كافئه على صبره و تحمله من كل اللي شافه و كرمه بأجمل نعيم الجنه هنقول ياريتنا كنا أحنا».
وتابع: «الصبر يا جماعة والثقة في وعد ربنا، الدنيا دلوقتي وسكان الأرض انقسمت ٢ ناس إيمانهم راح، وناس اتمسكوا بعقيدتهم أكتر، دول أول ناس كسبوا معركة الدنيا، ثقوا في كاتب الدنيا العظيم أنكم لازم هتسقفوا في النهاية من حلاوة نصره، وهو ينصر المظلوم بمعجزة من عنده تتحقق في الوقت المناسب اللي يعلمه هو مش إحنا والله، لازم يبقى معندناش شك نهائي في رحمته وفضله اكسبوا المعركة يا جماعة اوعوا ايمانكم بربنا يتهز أحنا كلنا اصلاً عايشين في اختبار ولازم ننجح فيه، ان شاء الله هتشوفوا بعنيكم أكبر رد من ربنا كما وعد في قرآنه الكريم، ثقوا في الله، أن وعد الله حق».
تابعوا آخر أهل مصر على Google News
