دافعت الفنانة ميسرة عن الفنان محمد سلام بعد انتقاد عدد من الإعلاميين له بعد اعتذاره عن المشاركة في مسرحية «زواج اصطناعي» بموسم الرياض بالسعودية بسبب تضامنه مع فلسطين.
اتهموه بالمزايدة والتبرؤ من الفن
وقالت ميسرة في تصريح لـ«أهل مصر»: «فيه اعلاميين كتير هاجموا محمد سلام واتهموه بالمزايدة والتبرؤ من الفن وهو ولا بيتبرأ من الفن ولا قال أن الفن عيب ولا الراجل قال حاجة خالص علشان كل واحد عايز يزايد عليه، أنتو اللي بتزايدو عليه على فكرة بشكل مش قادرة افهمه، هو الراجل قال أنا مش هقدر أروح وأنا عارف أن أخواتي بيتقلوا في الوقت ده وممنوع منهم الأكل والشرب والمياه وبيشربوا مياه ملوثة، وبيجلهم أمراض، الراجل قال حاجة إنسانية».
أنتو مستكترين عليه إنه مش قادر يروح
وتابعت ميسرة: «أنتو مستكترين عليه إن هو يبقى في هذا الموقف ومش قادر يروح، أنا بقول لكل إعلامي ياريت يسكت ويهدي المواقف مش محتاجة أنها تتشعلل لأن اللي بيستفيد من الموضوع ده بس الكيان المغتصب وأمريكا اللي بتحميه مع أوروبا هما دول المستفيدين وعايزين يعملوا تفرقة بيننا، فا ياريت كل واحد عنده منصب يعرف المنصب اللي فيه ويحترمه ويقدره ويعرف أن الكلمة اللى بيقولها ياما تبقى خنجر تقتل في العرب ياما تبقى في ايده خنجر يضرب العدو بيها، أحنا بنضرب بعضنا، أنا مش قادرة أفهم المفروض في الوقت اللي نتكاتف فيه بنضرب بعضينا».أتمنى تدخل نقيب الفنانين لحل مشكلة محمد سلام
وأضافت ميسرة: «أتمنى أن نقيب المهن التمثيلية أشرف زكي يتدخل لحل مشكلة محمد سلام ويهدي الموقف، ويفهمهم وجهة نظره أن هو مرفضش أنه يروح السعودية مرفضش أنه يشترك في موسم الرياض بدليل أنه كان داخل المسرحية، هو قال أنا غير قادر في الفترة الحالية، فرق كبير اوي اوي، وأكيد هو ليه كل الأحترام وكل الأحترام لكل القائمين على موسم الرياض، فا يا جماعة هدوا المواقف متخلوش أعدائنا تستفيد أكتر من كدا».
إعلاميين بيتكلموا كلام غير محسوب
وأختتمت ميسرة: «أنا مش قادرة أفهم إعلاميين ويمسكوا منصات وعلى التليفزيون وبيتكلموا كلام غير محسوب وغير مدروس ولا يعلموا عنه شئ، وهما اللي بيزايدو مش هو اللي بيزايد، هو غلط بس أنه طلع في فيديو وقال لكن هو مزايدش في اى حاجة، ممكن يكون علشان كان مضطرب وقرار مفاجئ عمله قبل السفر بيوم وتأخر هو في القرار جدا وحطهم في موقف محرج، ولأزم يجيبوا بديل سريع، فهو كان مضطرب وطلع يقول علشان كان عايز يعرف رأي الناس هل هو صح ولا غلط، لأن هو كان واضح عليه ضغوطات كتير ومتأثر نفسيا، ياجماعة أعذروا لناس وأرحموهم علشان ربنا يرحمنا بالذات في الأيام اللي أحنا فيها دي، وربنا يأخد اسرائيل وأمريكا وأوروبا مع بعض».
تابعوا آخر أهل مصر على Google News
