قال الفنان بيومي فؤاد: "ربنا رزقني في 2013 إني أضحك الناس بعد الفطار في مسلسل الكبير أوي، وأعمل دور الداعية في موجة حارة، ودور تراجيدي في مسلسل اسم مؤقت، ودي نعمة كبيرة من ربنا".
وأضاف خلال لقائه ببرنامج “صاحبة السعادة” الذي تقدمه الفنانة إسعاد يونس بقناة “دي إم سي”: "الفترة اللي فاتت كان عندي مشكلة صحية وأعصاب رجلي بتوجعني لو وقفت شوية ويبقى فيه تنميل وبمجرد ما أقف دقيقتين على رجلي تحصل لي مشكلة وتنميل، وبعدين عرفت السبب إن فيه قناة في ضهري بتقفل الدم وهي اللي بتجيب لي التنميلة دي ومشكلة في الأعصاب، وبدأت أخس علشان أشوف الدنيا، وكنت قررت السفر لألمانيا علشان أشوف موضوع رجليَّ ما عرفتش أسافر بسبب كثرة الأعمال".
ولفت: "مراتي وأولادي أكبر نقاد ليَّ، أنا عايش معاهم وفيه حاجات تنجح جماهيريًّا وتحقق إيرادات وهمَّ بيلوموني عليها يا إما شايفني بكرر نفسي وأنا أحيانًا بزعل منهم بس أنا متأكد أنهم حابين ليَّ الخير، ولكن الحقيقة أنا للأسف الشديد فيه أعمال كتير بعملها وأنا غير راضي عنها وفيه أعمال بروحها على أساس أنها يوم واحد فألاقي إني بطل العمل وبعدين أفاجئ إنهم يحطوني 30 مشهد في اليوم سينما مش دراما، أنا راهنت على تاريخي وحب الناس ليَّ كتير وضغطت على الناس أوي من منطلق مش حلو أوي يا بيومي بس احنا بنحبك وما تعملش كده تاني".
وتابع: " مرة شخص قال لي إيه يا أستاذ اللي أنت عامله في العمل ده فقولت أنا آسف ومش هعمل كده تاني، وأقسم بالله عمري ما اشتغلت علشان الفلوس واللهم لك الحمد ولادي متربيين على إن فيه فلوس تمام مفيش تمام".
وأكد بيومي فؤاد: "ولادي مرة شافوا عمل قعدوا أسبوع ما بيقولوا لي صباح الخير، ولما شافوا فيلم وش في وش كانوا معجبين جدًّا وجودي الصغيرة قالت لي هجب لك هدية ودا بتوفيق ربنا ثم نجاح المخرج".
تابعوا آخر أهل مصر على Google News
