تامر سمير: أمي كان عندها زهايمر ونسيت اسمي.. ورفضت أتاجر بمرضها

كشف الفنان تامر سمير، تفاصيل مرض والدته الراحلة، مؤكدًا أنه رفض استغلال مرضها في وسائل الإعلام، بجانب الكشف عن المواصفات التي يتمنى تواجدها في شريكة حياته.

وقال تامر سمير، في لقائه مع الإعلامية إنجي هشام، في برنامج 'المنسي' المذاع عبر شاشة قناة 'هي': كل القنوات كلمتني علشان مرض أمي ورفضت أتاجر بيه، أمي الله يرحمها كانت مناعتها ضعيفة وعندها زهايمر، وشيلت الفيديو لأن إخواتي زعلوا أني طلعت ماما من غير حجاب، ولكن أنا كان نيتي أن اللي عنده أم يتصور معاها وإزاي يتعاملوا مع مريض الزهايمر، والفيديو انتشر.

وتابع: كنت رايح برنامج علشان أوعي الناس إزاي يتعاملوا مع مريض الزهايمر، لاقيتهم باعتين ليا عربية علشان أنا وماما، أنا وماما إزاي؟ ده أنا أمي بتخاف من شاشة التلفزيون، ونسيت أخويا الكبير وكانت بتخاف منه لما بيجي البيت، مريض الزهايمر بيتعامل بالقلب مش بالعقل، وهي كانت حفظاني بقلبها، ولما كنت بتأخر شوية في المطبخ تقولهم فين الولد القصير ده؟ لأنها كانت ناسية اسمي.

وأضاف: القنوات كانت متفقة مع بعض كلهم أن والدتي تظهر، ولو أنا رفضت يلغوا بشكل لطيف، وأنا رفضت أتاجر بمرض أمي.

أما عن المواصفات التي يتمنى تواجدها في شريكة حياته: عايزها تستوعب أني فنان لاسع، وأنا من هواياتي غسيل المواعين.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.