حل الفنان هاني رمزي مساء اليوم الجمعة، ضيفًا على بودكاست "Restart" الذي تقدمه الإعلامية داليا المتبولي، حيث كشف عن تفاصيل مسلسل "بدون مقابل"، الذي كان من المقرر عرضه في الموسم الرمضاني الماضي 2024، وسر تأجيله.
وأوضح هاني رمزي سبب تأجيل المسلسل، قائلا: "الأسباب إن احنا بدأنا متأخر تصوير المسلسل ومش جاهزين، والحق يتقال مسلسل زي دا 30 حلقة مليان أحداث كتير جدًا، فيه ديكورات كتير جدًا، فيه ممثلين كتير جدًا، كان لازم نبدأ بدري".
وتابع هاني رمزي: "الموضوع بتاع المسلسل بيدور حوالين رجال الأمن وتضحياتهم من أجل البلد، وحبهم وانتمائهم لبلدهم، ودا بيعملوه بلا مقابل عشان كدا المسلسل اسمه بدون مقابل".
وتابع: "المسلسل مش كوميدي، وهو في المقام الأول مسلسل اجتماعي إنساني جدا، والجانب الأمني اللي فيه ممكن نقول مثلا 20 %، وفيه حياة الناس الاجتماعية، وقد إيه الناس دي في حياتهم الشخصية بيتعرضوا لضغوط كتيرة جدًا".
وواصل رمزي حديثه: "بسبب إيماني بالمسلسل وحبي له، كان نفسي يتعرض على طول، لكن اتأجلت الفرحة شوية، وإحنا لو كنا هنشتغل عشان نعرض في شهر رمضان، كنا هنشتغل تحت ضغط عالي جدًا، والنوعية دي من المسلسلات لازم تاخد حقها في التصوير وحقها في التدقيق، ومعايا مخرج أستاذ جمال عبد الحميد، بيدقق في كل حاجة وبيتكلم في كل التفاصيل، والمسلسل من تأليف أستاذ حسام موسى، وإنتاج محمد فوزي، ومعايا كم كبير جدا من النجوم".
وتابع: "المسلسل عايز لوك يخليني أظهر بشكل غير معتاد، وأنا بقدم فيه دور يعتبر تراجيدي، وجد جدا، بعيد عن الكوميديا اللي الناس اعتادت عليها مني، فالمرة دي كان لازم يبقى في تغيير في الشكل شوية"، مضيفًا: "المخرج اللي طلب مني أربي دقني، ودا عمري ما عملته قبل كدا".
وعن مشاركته الفنان عمرو عبد الجليل في المسلسل، قال: "عمرو عبد الجليل نجم كبير وممثل عظيم، وشهادتي فيه من أيام ما كنا زمايل في المعهد العالي للفنون المسرحية، واحنا دفعة واحدة ومثلنا مع بعض، وأنا عارف امكاناته كويس، وعارف قد إيه هو ممثل عظيم، وتربطني به صداقة قوية حتى مع أسرته، لأن أخوه السيناريست طارق عبد الجليل، الله يرحمه، عملي أفلام كتير، زي عايز حقي، وأبو العربي، ونمس بوند".
تابعوا آخر أهل مصر على Google News
