شادي شامل: باعمل بوتكس وطول عمري ملتزم بالصلاة

أثارت تصريحات الفنان شادي شامل حالة من الجدل، بعد حديثه عن العديد من الأسرار في حياته الشخصية، والعلاقة القوية التي تربطه بوالده.

ونفى شادي شامل، في حواره مع المذيعة أميرة بدر في برنامج 'خلاصة الكلام' المعروض على قناة النهار، أن يكون ارتكب خطأ يصفه بالكبير في تلك الفترة.

وقال: 'طول عمري فيه سقف للغلط، بنات يعني؟ أكيد عرفت الدنيا كلها، لكن المخدرات عمري ما جربتها، بالنسبة للموضوع ده كان ابتعادي عنه من عند ربنا لأن في فترة المراهقة كنت بحب الموسيقى، والمخدرات بتاعتي كانت المزيكا، منجرفتش لأي حاجة يمكن شربت سجاير مؤخرًا من كام سنة'.

وأشار إلى أن والده كان أبا شديدا وصارما جدا 'مكانش بيمد إيديه، نادرا جدا، وكان صارم في أمور أنه لا يمكن أقوله انت ولازم أقول حضرتك ولازم أبوس إيديه ومينفعش أبدأ أكل على السفرة غير لما هو يجي ومينفعش أقوم غير لما يقوم، ولازم أغسل طبقي، وبشكره دلوقتي على الشدة دي، اللي عمله صح، وحنية الدنيا كانت فيه، لما كبرت بقينا أصحاب'.

وتابع شادي 'بعامل أولادي بطريقة معدلة شوية، تخاف مني وتهابني بس من النظرة تفهم، فيه تربية جديدة، بعيدا عن الضرب فيه احترام'.

وعاد للحديث عن والده، وكيف كان يتعامل معه في مسألة الالتزام بالأمور الدينية، موضحا 'كان بيقولي صلي وأنا طول عمري ملتزم بالصلاة، ساعات كنت بقصر غصب عن الواحد، ودلوقتي ممكن يكون التقصير إني بصلي الفروض اللي مصلتهاش قبل ما أنام. وأمي علمتني حاجة حلوة قوي وهي الاستغفار بقعد استغفر كتير جدا'.

شادي شامل: بعمل بوتكس ومش عيب الراجل يهتم بنفسه

وتابع في حواره مع المذيعة أميرة بدر في برنامج 'خلاصة الكلام' المعروض على قناة النهار: 'بحب نفسي أكيد، لازم أحب نفسي مش حكاية معجب بنفسي، يمكن واثق من نفسي، وأنا قديم برضه خلي بالك مش غرور ولا تكبر، وبحب روحي العادية التلقائية، وبصحى أبص لنفسي في المراية وادلع نفسي'.

وتابع 'أنا من الشخصيات اللي تحب دائما تكلم نفسها، وساعات بكون مش طايق ابص لنفسي في المراية. وطول عمري شكلي كده، يمكن ساعة عبدالحليم حافظ كانت شخصية وعملتها، وطبيعي مع مرور السنين إني كبرت فشكلي اتغير'.

وعن الإجراءات التجميلية التي قام بها، أوضح 'عامل بوتكس، وفيلر مرة واحدة عملته من كام سنة، كنت في دبي لكن أنا بعمل بوتكس دلوقتي بس، وكل فنانين مصر بيعملوا بوتكس، ومش عيب الراجل يهتم بنفسه لو حاجة هتحلي من شكلك اعملها لكن لو هيكون زيادة عن اللزوم ليه نعملها، زي ما الست بتهتم بنفسها لازم الراجل يهتم بنفسه في إطار معين، ولازم أكون قدام الست شكلي كويس وإحنا فنانين'.