علقت الاعلامية أسما شريف منير، على الأخبار السلبية التي انتشرت حولها، خلال الفترة الأخيرة، وذلك عبر حسابها الشخصي على موقع إنستجرام.
وقالت أسما شريف منير: 'طيب دا خبر اتبعتلي، لسة شايفاه، محتاجة اتكلم عنه عشان بس أفهم الناس حاجة، أنا حاولت أتواصل مع الأستاذة إيمان عبد اللطيف اللي منزلة خبر عنوانه، تعليق لـ أسما شريف منير، بعد ظهورها بالمايوه، أولا أنا مظهرتش لا بمايوه، ولا أي حاجة، لأني بيساطة مسافرتش أصلاً، أنا مسحولة في شغلي، ولما سافرت في العيد منزلتش صورة بالمايوه، بنقّي الصور اللي ينفع تنزل، ولا في أي صورة، دايما بحاول أخبي بإيدي نفسي، حتى لما بالبس مايوه مش بنزل صور بيه، فهي قررت أنها على حسابي تثير الجدل، ويرجعوا الناس بقولوا أني بحب الترند وبثير أم الجدل'.
وتابعت: 'ولما كتبت أني لقيت اللي بدور عليه كان قصدي (نفسي)، أني لقيت نفسي، مش حب جديد، لما ارتبط هقول، لما أحب مش هقول، عشان دا ميخصش حد، طول الوقت عندي مشاكل مع أبويا بسبب الأخبار البشعة دي، اللي عايزين يصوروا للناس بيها إني صايعة، ومنيلة الدنيا، والحقيقة إني مطحونة في شغلي وفي حالي، وكل خبر نزل عني كانت حقيقته غير اللي الصحف صورته عني، من موضوع الپول لرأيي في شخص مهم، لحلق شعري، أي حاجة بيعملوا منها أخبار مثيرة ومش مهم الشخص دا حقيقة حياته إيه، عنده أولاد عنده أب محترم ميستحملش الكلام اللي الناس بتقوله، والناس على طول تشتم وتدعي العفه، وتطلعك أوحش شخص في الكون، وتصدق أخبار كدابة، أنا مش مسامحة أي حد كتب عني خبر كاذب أو استغلني في نشر خبر للبلبلة، ودا هنعرف نتيجته قدام ربنا لما نقف قدام بعض وربنا يجيب حقي منهم كلهم'.
وأكلمت: 'أنا عارفة أنا مين وجوايا إيه، ومش بيقرق معايا الناس، اللي يقول يقول، واللي يشتم يشتم، واللي يصدق يصدق، أنا اللي بيهمني بس بنتي وأبويا، غير كدا محدش بيفرق معايا، لأن الناس مش بيعجبها أي حاجة، وبيفتكروا أنهم لما بيشتموا أو يتنمروا أو يغتابوا ربنا هيعديها، أهي كلها حسنات بيدوهاني، أنا بس حبيت أقول أن حقيقي شيء مؤسف أن حد يكتب خبر زي دا، عشان فاكر أن دا نجاح، دا مش نجاح دا تجريح، أنا عارفة أني مش هغير الكون بالپوست دا، بس على الأقل يمكن حد يفهم إزاي الناس اللي تحت الأضواء، الناس ببساطة ممكن يشوهوا سمعتهم، يمكن تفهموا أنكم متصدقوش كل حاجة بتتنشر، يمكن حد يفهم إزاي بيتم استغلال الناس المعروفة بشكل بشع زي دا… ربنا كبير.. يا ريت يا أستاذة إيمان تشيلي الخبر عشان هو مش حقيقي'.
تابعوا آخر أهل مصر على Google News
