صورة رياضية نادرة لمحمود المليجي

نشر الناقد الفني إلهامي سمير، صورة نادرة للفنانة محمود محمود المليجي أثناء لعب الملاكمة، وذلك عبر حسابه الرسمي على موقع التواصل الاجتماعي «فيسبوك».

وكتب إلهامي سمير: «دي صورة لمحمود المليجي لما كان بيلعب ملاكمة، واللي ميعرفش فالمليجي كان بيحلم من صغره إنه يبقى ملاكم، لحد ما حصل له موقف اتسبب في إنه يهجر الملاكمة ويديها ضهره، واللي حصل إنه فى يوم من الأيام يا سادة يا كرام، شارك المليجى في بطولة للقطر المصري وزن الريشة».

وتابع: «وقبل ما تيجى معاد المباراة بتاعته وقف المليجى يتفرج على ماتشات الأوزان الخفيفة، وفجأة لقى واحد طول بعرض واقف جنبه وبيسأله أنت هتلاعب مين، فقاله مش عارف أهو هتلاقيه عيل خرع، بعد شوية انتهت مباريات الأوزان الخفيفة وجه الدور على ماتش محمود اللي اتفاجئ إنه هيلاعب الأخ اللي كان واقف جنبه وبيسأله هتلاعب مين».

وأضاف سمير: «وبدأ الماتش وبدأ الأخ يضرب يمين وشمال كأنه بينتقم أو عايز يثبت له إنه مش خرع ولا حاجة، وبعد أول جولة أضطر محمود إنه ينسحب علشان يحافظ على حياته، وقرر بعدها إنه يهجر الملاكمة واشتغل لفترة مدرب لبعض هواة الملاكمة لحد ما جرفه التمثيل».