نشر المخرج محمد سامي بيانًا عبر حسابه الرسمي على موقع فيسبوك، ردّ فيه على الجدل المثار مؤخرًا بشأن خلافه مع الفنانة عفاف شعيب، مؤكدًا أن الواقعة قديمة وصدر فيها حكم قضائي نهائي بالبراءة، ومشددًا على أنه لم يتجاوز أو يُسِئ لأي طرف.
كتب محمد سامي:'مدام عفاف شعيب بقالها سنتين بترفع عليا قضايا و بتخسرها ، والنهاردة كانت آخر قضية و برضه خسرتها، ماعرفش ليه هى مصره تقاضينى بدون و جه حق و تقول إنى سبتها وغلطت فيها فى أحد البرامج التلفزيونية و ده محصلش، و المحاكم حكمت إنه محصلش و بأحكام نهائية و المحاكم سببت أحكامها بأنه لم يحدث منى تجاهها أى تجاوز أو إساءة و كل الأحكام الصادرة من المحاكم الجنائية و المدنية كانت لصالحى فى كل الدرجات'.
تابع:' وأصلا الحلقة اللى هى إدعت إنى سبتها فيها موجوده أون لاين و أى حد يقدر يشوفها، أنا مستحيل أتجاوز في حق ست فى سن أمى أو أكبر و كمان فنانة كبيرة و ليها تاريخها، أنا أول مرة اقول تصريح بخصوص الموضوع ده لأنى إنتظرت لما الفنانة تخسر القضايا بكل درجاتها زي ماحصل وبعدين أتكلم'.
وأكمل سامي:'دلوقتى بناقش أنا و المستشار القانوني الأستاذ/شعبان سعيد المحامى المفروض نعمل إيه الفترة دى بعد سنتين من التجاوز فى حقى و الإساءة لشخصى، إما إننا نبدأ نتخذ إجراءات قانونية ضدها بالتعويض على التشهير و إفساد السمعة أو إننا نقول عفا الله عما سلف و الست و المحامى بتاعها دلوقتى فيهم اللى مكفيهم و المفروض نكبر دماغنا و مانزودش عليهم الهم و نسامحهم و ناخدهم و نتعشى مع بعض بره و نعزمهم على (ريش و بيتزا ) .
ويُذكر أن الخلاف بين الطرفين شهد تداولًا إعلاميًا واسعًا خلال الفترة الماضية، قبل أن يؤكد محمد سامي صدور أحكام قضائية لصالحه، مطالبًا بوقف ما وصفه بالتشهير والحديث الإعلامي خارج إطار القانون.
تابعوا آخر أهل مصر على Google News
