أسرار سارة خليفة.. من الشهرة ونصف مليون شهريًا إلى قفص الاتهام في قضية مخدرات| نص تحقيقات

كتب : فاطمة مرشدي

حصلت أهل مصر على نص تحقيقات النيابة العامة مع المذيعة سارة خليفة، المتهمة بالانضمام لعصابة دولية لترويج المواد المخدرة، والمتورطة مع آخرين في أنشطة مشبوهة حققت من ورائها أرباحًا طائلة وصلت إلى نصف مليون جنيه شهريًا.

وكشفت التحقيقات عن مسيرة حياتها منذ الطفولة، مرورًا بعملها الإعلامي داخل مصر وخارجها، وصولًا إلى امتلاكها شركات وحسابات بنكية وأملاك، قبل أن تنتهي بها الطريق إلى قفص الاتهام.

س/ متى وأين تم ضبطك؟

ج/ اتقبض عليا يوم الخميس اللي فات الساعة 12 الظهر من بيتي في العجوزة.

س/ ما هي تفصيلات نشأتك؟

ج/ عندي أخ وأخت هما محمد وشروق (عندها 27 سنة). والدي كان شغال في الجيش وبعدين اشتغل في هيئة قناة السويس وحاليا بالمعاش، والدتي طول عمرها شغالة في مستشفى ودلوقتي شغالة في عيادة خاصة بيا.

وأنا طفلة كنت عايشة مع والديّ في النزهة، وبعدين انتقلنا للعبور في أيام الكلية، وبعدها رحنا مدينتي وأنا عندي 20 أو 21 سنة. كنا عايشين في بيت واحد: أنا، وأخويا، أبويا، أمي، وأختي اتجوزت وهي عندها 21 سنة، وجوزها بيشتغل في ميناء إسكندرية وعنده شركة نقل عربيات.

أخويا محمد كان متجوز، قبلها حياتي كانت طبيعية، اتجوزت سنة 2015 واتطلقت سنة 2017، ومن وقتها وأنا عايشة مع بابا وماما.

س/ ما هي حالتك الاجتماعية الآن؟

ج/ اتجوزت مرة واحدة وماتجوزتش تاني، وحاليا مطلقة.

س/ ما سبب طلاقك؟

ج/ جوزي كان لاعب كرة، ولما سافر بره مصر حياتنا بدأت ما تستقرش.

س/ هل لديكِ أطفال؟

ج/ لا.

س/ ما هي مراحلك التعليمية؟

ج/ دخلت الابتدائية في مدرسة رجاك، وبعدها مدرسة الأورمان، وخدت الإعدادية، وثانوي عام كان من مدرسة حكومية في السلام (قرب شغل مامتي)، وبعد كده دخلت كلية حقوق جامعة عين شمس وتخرجت 2008، وبعدها أخدت بكالوريوس إعلام من الأكاديمية الدولية للإعلام، وكنت بشتغل مذيعة وبدرس في نفس الوقت، حصلت على بكالوريوس الإعلام قبل جوازي بحوالي 3 سنين.

س/ ما هي الوظائف التي شغلتِها خلال حياتك؟

ج/ وأنا عندي 13 سنة اشتغلت في برنامج أطفال على قناة ART، وبعدين اشتغلت مذيعة برامج منوعات بالقناة دي لحد ما دخلت الكلية، أثناء الدراسة اشتغلت مذيعة في قناة الشرقية العراقية، وقدمت فيها برامج كتير لتغطية أحداث فنية.

بعدها اشتغلت في قناة المحور وقدمت برنامج 'مهمة صعبة' بالتعاون مع وزارة الداخلية، واستمر حوالي 4 سنين، بعد البرنامج فتحت عيادة، وقبلها كنت شغالة في دبي في مجال الإعلانات على السوشيال ميديا مع شركة 'فورد كشر ميديا' لعمل دعايا للفنادق مقابل نسبة من النزلاء شهريًا، وآخر شغلي كان افتتاح عيادة تجميل سنة 2019، والعيادة مرخصة باسمي لكن باسم شريكي دكتور أحمد رزق.

ووقت الكورونا سافرت دبي وعملت عقد مع مجموعة الحنور لتنظيم الحفلات، وفتحت شركة 'سارة برودكشن' في دبي سنة 2021 أو 2022 لتنظيم حفلات المطربين بجانب شغلي، قدمت برنامج 'أحمد وسارة وبيكا' على قناة 'هي'، وفي الغالب كل سنة بعمل برنامج جديد.

س/ ما مقدار دخلك الشهري؟

ج/ ممكن يوصل لنص مليون جنيه شهريًا.

س/ ما هي مصادر دخلك؟

ج/ تعاقدات الحفلات، تعاقدات الإعلانات، وشراكة العيادة.

س/ ماذا عن شركتك في الإمارات؟

ج/ هي أكبر مصدر دخل بالنسبة لي.

س/ ما مقدار أرباح الشركة سنويًا أو شهريًا؟

ج/ في الحفلة الواحدة بكسب من 30 إلى 50 ألف دولار، وبعمل في السنة حوالي 12 إلى 15 حفلة.

س/ هل لديكِ مصادر دخل أخرى؟

ج/ آه، بتاجر في الذهب، وأي فلوس تيجيلي بشتري بيها سبائك وأبيعها لما تكسب.

س/ ما هي أملاكك تحديدًا؟

ج/ عندي شقة في التجمع ولسه ما استلمتهاش من شركة نادر خزان المثمن العقاري، ولسه مش باسمي.