كشف الدكتور محمد الطيب المتحدث الرسمي باسم وزارة التعليم العالي، عن سبب اختيار جامعة عين شمس مقرا جديدا لمكتب التنسيق لعام 2020، نافيًا محاولة إشعال الفتنة بين جامعتين عريقتين هما الأقدم في مصر.
ونشر الطيب عبر حسابه الشخصي على فيسبوك، ردا على التساؤلات المثارة قائلا: "نقل مقر التنسيق من جامعة القاهرة إلى جامعة عين شمس، مش متعود أرد على الأكاذيب والادعاءات التي يدعيها بعض ضعاف النفوس أو الفلوس، ومحاولة إشعال فتنة بين جامعتين عريقتين هما الأقدم في مصر".
وتابع : "ببساطة للي عاوز يفهم، الوزارة طلبت من جامعة القاهرة زي كل عام الحصول على مقر مكتب التنسيق ولكن جامعة القاهرة ما ناسبهاش السنة دي علشان بيقولوا إن المقر مستخدم للعزل ولما الوزارة اقترحت أكتر من اقتراح مناسب كمقر بديل داخل جامعة القاهرة بردو مكنش مناسب بالنسبة للجامعة، لكن الجامعة اقترحت مكانين للأسف مينفعوش على الإطلاق، وعلشان موعد التنسيق اقترب والجميع عارف إنه بيستقبل آلاف سنويًا وتم الطلب من جامعة تانية، بالمناسبة مش عين شمس، ولكن أيضا لم يكن المكان مناسبا ولذلك تم الطلب من جامعة عين شمس واللي هي رحبت جدا".
وأضاف الطيب: "وبالمناسبة جامعة عين شمس جامعة مصرية خالصة، مش أعداء يعني، وبالمناسبة الوزير لم يتدخل على الإطلاق في اختيار المقر الجديد ولكن الراجل المحترم جدا رئيس قطاع التعليم والمشرف على التنسيق هو اللي كان بيتابع الأمر، المهم بقى جدا إن كل كلامي طبعا موثق مش ضرب نار من ضعاف الفلوس قاصدين منه الوقيعة في ظل ظروف البلد محتاجة من الجميع التكاتف، بالمناسبة في موضوع تاني مهم جدا هرد عليه بس بكرة، تحية كبيرة أوي للقاهرة وعين شمس، احترامي وتقديري للجميع".
تابعوا آخر أهل مصر على Google News
