بعد نجاحه في الثانوية العامة، رغب الالتحاق بكلية التربية الرياضية 2020 ودفع رسوم دفع اختبارات القدرات، وبدأ تأهيل ذاته بالتمارين الرياضية المختلفة، ولم يخطر في باله سبب رسوبه الذي كان ينتظره من بين الطلاب المتقدمين، والذي لم يكن بيده تغيره أو دخل فيه.
'أنا شكلي قبيح'.. بهذه العبارة المؤثرة حكي 'أحمد' طالب الثانوية العامة سبب رسوبه اختبارات كلية التربية الرياضية 2020 قبل أن يمارسها وسط زملائه المتقدمين للالتحاق بالكلية، وتعاطف رواد مواقع التواصل الاجتماعي مع قصته بتدشين'هاشتاجات' بنداء إلى رئاسة الوزراء، وزارة التعليم العالي والبحث العالمي لمواجهة العنصرية التى تعرض لها الشاب، وأثرت على مسيرته التعليمية وصحته النفسية.
يروي 'أحمد قصته' عندما توجه إلى كلية التربية الرياضية الساعة التاسعة صباحًا لإجراء اختبارات القدرات، قائلاً ' ذهبت أقدم الورق وأدخل الاختبارات وقعدت انزل واطلع من الساعه ٩ للساعه ١ وبعد كدا قعدت ساعة دفعت ٤٥٠ جنيه الأول غير الورق اللي صورته وبعد كدا دخلت وقلعت ملابسي للكشف عن أى إصابات بجسدي'.
وأضاف 'قست الطول والوزن وطلع مناسب جدا وبعد كدا رحت للدكتور التاني عشان الاختبار.. انزل عشره ضغط.. أقف على مشط رجلك ونط.. اقعد واقف وانت مربع من غير ما تسند، وبعد كدا قالولنا ننزل الكمامه وبعدها لقيت نظراته ليا اتغيرت وقعد مركز معايا شوية ومركز في شفتي أوي'.
'أنا شكلي قبيح'.. حكاية 'أحمد' الراسب في اختبارات كلية التربية الرياضية 2020
واستكمل حديثه بدهشة: 'بعدها ندهلي قالي اسمك أي قولتله كذا كذا يادكتور قالي أيه اللي في شفتك دا.. قولتله عمليه حضرتك وبعد خمس شهور بالكتير هعمل عملية تانية وشفتي هترجع طبيعيه وهشيل التقويم وهبقا زي الفل.. فقالي طب ارجع تاني وقفت مع زمايلي فلقيته قالهم روحوا انتو للخطوات اللي بعد كدا وقالي أقف انت عاوزك.. طبعا أنا استغربت.. اللي هو في أي وبعدين ايه البصات اللي بيبصهالي دي، فبعد ما ذنبني شويه قالي تعالى.. فروحت قالي روح البس هدومك وروح.. قولتله ليه يا دكتور دا أنا حتى لسه ما دخلتش اختبار الجري ولا حتى الخطوات اللي بعد كدا.. قالي انت شكلك مينفعش.. قالي عشان مصلحتك بس قولتله الكلية كلها حركة وجرى وسباحه ولو في بوكس وملاكمة فانا بقول لحضرتك أنا بعد خمس شهور كل دا هيبقا زي الفل.. قالي انت كشكل أصلا مينفعش يبني وبعد كدا قالي يلا اتفضل روح البس وروح'.
وتابع 'طب اقسم بالله إن كان معايا واحد ميقلش عن 120 كيلو واتقبل عادي… نزلت سألتهم وقولتلهم عاوز الـ450 بتوعي عشان امشي لأني لسه حتى مدخلتش الاختبارات ولا عملت أي حاجه يعني دفعتهم عالفاضي، الاقي الأمن يقولي بح ياباشا كان فيه وخلص مينفعش تاخدهم تاني.. طلعت لحد مهم فوق في مكتبه قالي طالما كتبت اسمك عالظرف يبقى متعرفش تاخدهم.. قولتله تمام بس أنا اصلا مدخلتش الاختبارات يعني لو دخلت أوك إنما أنا مدخلتش.. إن جيت للحق معاملته كانت في منتهى الاحترام بس على كلامه أنه ميقدرش يعمل شئ، نزلت وأنا مش مسامح في الفلوس طبعا.. اللي موتني أن أنا ليه متقبلتش.. علشان شكلي مش لايق عالكليه على كلام اللي كان فوق في الكشف الطبي.. يعني أنا قبيح.. بلد ماشيه بالعنصرية طول عمرها.. أنا وأنا طفل ياما خدت تريقه واتعنصرت عنصره هدت آمالي وطموحاتي في حاجة أنا مليش ذنب فيها.. والله مش أنا اللي خلقتني عشان أكون وحش في نظركم'.
اختبارات كلية التربية الرياضية 2020
عميد كلية التربية الرياضية بجامعة كفر الشيخ يعلق على واقعة "أحمد"
علق الدكتور عبد الحليم عكاشة، عميد كلية التربية الرياضية بجامعة كفر الشيخ، على واقعة هذا الطالب، فقال في تعليق عبر منشور أحد المدرسين الذي استغاث به ليحقق في هذا الأمر :'السلام عليكم ورحمة الله وبركاته.. تحياتي واعزازي أخي العزيز الدكتور هاني.. أكيد طبعًا أنا مكتبي مفتوح للجميع.. يشرفني ابننا العزيز وإن كان له حق سوف يصله فورا ويعاقب المخطئ وأتمني أن يكون له حق فيما نشره.. خالص تقديري وإعزازي'.
تابعوا آخر أهل مصر على Google News
