تواصلت ' أهل مصر' مع الدكتور طارق شوقي وزير التربية والتعليم والتعليم الفني؛ للتعليق على واقعة احتجاز طلاب بمدرسة فيصل، وتهديد مدير المدير أولياء الأمور بالحصانة، حتى تسلم بعض أولياء الأمور أولادهم عن طريق أقسام الشرطة.
وقال الدكتور طارق شوقى وزير التعليم في تصريح خاص لـ 'أهل مصر': لم أسمع عن هذه الواقعة وسنقوم بمتابعتها'.
حيث تقدم أولياء أمور مدرسة حسام الدين بشارع العشرين فيصل، باستغاثة إلى الدكتور طارق شوقي وزير التربية والتعليم والتعليم الفني، ضد إدارة المدرسة بسبب امتناعهم عن تسليم الطلاب أمس، لأولياء الأمور بعد انتهاء اليوم الدراسي، وحدوث مشاجرات وتزاحم بين أولياء الأمور وإدارة المدرسة.
وقال حساب يحمل اسم شيرى زيدان، 'إن مدير المدرسة رفض أي واحدة معاها طفل صغير تدخل المدرسة وتستلم ابنها فبتالي الناس فضلت واقفة مستنية تاخد عيالها من الساعه ١٢ونص لحد ٢ وفي الآخر أولياء الأمور طلبوا الشرطة واستلموا أولادهم بمحضر، وكان بيزعق لناس ويقول أنا معايا حصانة لأنه عضو مجلس الشعب'.
وقال محمود صادق ولي أمر طالب بالمدرسة، 'مراتي راحت تاخد ولادي من المدرسة ميعاد خرجوهم الساعه 12.15 من الباب إلى جنب موقف العربيات بتاع الشارع، وفضلوا يقولوا لا الباب التاني لا اللي بعده من 12.15 حتى الساعه 1.30 لم تستطع أن تستلم الولد طبعا تزاحم على باب المدرسة دون كمامات ولا حاجه أكتر من 80 ولي أمر واقفين ومراتي شيله ابني 6 شهور وبنتي اللي في سنة أولى ابتدائي من الساعه 12 وبعد فقد الناس أعصابها وقلقها على الولاد بدأوا يزعقوا، طلع الأستاذ مندوه الحسيني ليلفظ بكل لفظ يسيئ للمدرسة والمنظومة التعليمية بالكامل ويقول لأولياء الأمور مفيش عيال طب هات الكارنيهات بتاعتهم يرد مفيش عيال ولا كارنيهات واتفضلوا اعملوا اللي انتوا عاوزينه احنا معانا حصانة هيا دي ثقة الناس اللي اختارتك طب اللي مش عارف ياخد حقه منك من مدرسة بيدفع فيها دم قلبه لولاده مين هياخد حقه منك كنائب في مجلس الشعب، لحد مادخل ولي أمر بالقوه لفت مراتي وعدد من السيدات المحترمين لرسبشن للمرة السادسة لقت الراجل طالع مبهدل وكل الناس بتتحايل عليه وتقوله معلش يأعالم حصل معاه ايه جوه وأنا زوجتي انهارت هيا وناس تانية في الآخر تكرمت واحدة من الموظفين وراحت جابت الولد الساعه 2: 10 لاقته اليونيفورم متبهدل وقالها أنا قاعد من بدري من الساعه 12 ليه سيباني جعان وتعبان حرام عليكِ يرضى مين ده بالله عليكم'.
ونشر حساب على الفيس بوك يحمل اسم نور الهدى، 'كنت واقفة في منتهى الاحترام الباشا المندوه هو اللي حب يعمل نمرة قدام الناس والعمال وماكنش ليه لازمه اللي اتعمل كله هو استفز الناس كلها، أنا واخده بنتي الساعة ١/٤٥ بالعافية'.
وعلق حساب يحمل اسم جهاد محمود ولى أمر: 'أنا الأم اللي مكانتش عارفة توصل لابنها أنا كان ممكن استني ساعتين تلاته مش مشكلة لو هما لسه في الفصول بيدرسوا أو بيمتحنوا لكن ابني يبقى قاعد في الجاردن من 12.20 لحد 2.15 لييييه، وانا مستنياه بره والباشا مش راضي يدخلني وزقينا الباب كتير ودخلنا بالقوة واتخانقنا وزعقنا، وفي راجل حاول يتكلم معاه بكل احترام في الأول رد عليه بنفس اللفظ كده وقاله: مهما بصتلي وبرقتلي والله مانت داخلها ولا يهمني. المدرسة دي مفتوحه بفلوسنا وفي ناس راحة القسم فعلا وكنت رايحه بالفعل لولا أن واحدة من الاستقبال قالتلي أنا هجيبلك ابنك بس متتعصبيش علشان البيبي اللي ع دراعك وحاجة غريبة إن معظم الأطفال اللي خارجين كانو بيعيطوا فلما سالت ابني بعد ماطلع وشكله وهدومه متبهدله وتراب قالي عمو الكبير أبو بدله ده كان بيزعق أوي واحنا خايفين وبقالنا كتير قاعدين وزهقنا من الساعه 12 وتلت'.
تابعوا آخر أهل مصر على Google News
