علقت الدكتورة شيرين علي زكي رئيس لجنة سلامة الغذاء والمتابعة الميدانية بالنقابة العامة للأطباء البيطريين، على تحذيرات عبدالعزيز السيد رئيس شعبة الثروة الداجنة بالغرفة التجارية، بشأن إنفلونزا الطيور، بأنه لا يجب تناول الطيور المصابة حتى بعد الطهو الجيد، وذلك لأن الطيور المصابة بالفيرس تكون مصابة بالحمى كأحد أعراض الإصابة، ما يجعل اللحم محتقن بالدماء، ويظهر ذلك في لون الفرخة يصبح غامق بتدرجات ألوان تصل إلى اللون القرمزي، قائلة: "الدم وسط ملوِث وملوَث لذلك بننصح حضراتكم بعدم تناول الطيور المصابة حتى بعد تمام الطهي والتسوية".
وأضافت رئيس لجنة سلامة الغذاء: "اللي مربية فراخ من حضراتكم لازم تداوم على تحصينها، واللقاح موجود في الوحدات البيطرية وكمان في أطباء بيطريين بيقوموا بالتحصين".
وتابعت: "اللي مربية فراخ أرجوكي لا تجيبي فراخ ولا بط من الأسواق وتدخليهم على الفراخ اللي أنتي مربياها لأنها قد تكون حاملة للعدوى، هاتي كتاكيت سلالات من أي مركز طبي بيطري أو صيدلية بيطرية لأنها الأضمن".
ووجهة عدد من النصائح للسيدات: "متشتريش الفراخ إلا من مجزر معتمد ولو مش جنبك مجزر هات الفراخ المبردة اللي بتكون فريش وبتتباع في أي هايبر، ونصيحة مني هاتها في نفس يوم الذبح أو تاني يوم من تاريخ الذبح المدون على العبوة وده علشان ريحتها متكونش لسه اتغيرت لأن أحيانا الرائحة دي بتضايقكم، لأن المجازر دي أو الفراخ المبردة بتكون تحت إشراف منظومة الطب البيطري من أول ما تواجدت في المزرعة مرورا بسحب عينات منها تفيد خلوها من إنفلونزا الطيور ومرورا بالكشف عليها قبل وأثناء وبعد الذبح واستبعاد المريض وغير الصالح منها ونهاية بتكييسها كفرخة كاملة أو مقطعات دواجن الفرارجي مش بيتوفر عنده المنظومة دي علاوة على عدم اتباعه للاشتراطات الصحية السليمة".
تابعوا آخر أهل مصر على Google News
