قال الرئيس عبدالفتاح السيسي: «فيه رجل أعمال فاضل جدا في 2015 قال عاوز أعمل حاجة خيرية وقالي عملت تصميماتها في أمريكا وبرضه عاوز الهيئة الهندسية تعملها، قلتله الفكرة اللى انت حاططها غير قابلة للنجاح فقال ليه؟ قلتله وبقول للمصريين في الفلوس انا عندي مشكلة اشوفها بشكل متتخيلهوش في ضعفها وفي قوتها».
الرئيس السيسي في مؤتمر حكاية وطن
أضاف الرئيس السيسي، خلال كلمته في مؤتمر «حكاية وطن»، اليوم الاثنين: «أنت بتتكلم على مستشفى هتتكلف 20 مليار جنيه هتقدر تجيب الرقم ده؟ وعدد الأسرة اللي انت حاططها فوق الألف سرير، طيب أنت عارف المريض هنا بيتكلف كام؟، متصور أنك أنت عاوز 4 مليارات جنيه تكاليف تشغيل المستشفى على الأقل، صدقني مش قابلة للنجاح، فقالي أنا هكمل وأنا عارف وهجيب التبرعات بتاعتها ومعايا مليار وشوية وده كان رقم كبير قلتله ماشي، طيب حد يقولي طيب أنت عارف أنها مش ناجحة طيب بيتعملها ليه ؟، لا ده أنا باخد الفكرة غير القابلة للنجاح وأنا أعمل إيه؟، أنجحها».
وتابع «السيسي»: «وزير الصحة جابلي معهد ناصر وقال شوية تطوير يعني قلتله لا يا خالد معهد ناصر هايبقا مدينة طبية عالمية تتكلف كام؟ وتتعمل إزاي؟ أنا اتصرف فيه مش الحكومة تتصرف فيه وده مسار تاني».
وواصل الرئيس: «المستشفى كلفتنا حتى الآن 6 مليارات جنيه وهتوصل 10 مليارات غير التجهيزات وعملنا اختصار للعدد من ألف الى 340 سرير، بقرأ في الجرايد وكل اللى بتكتبوه وتقولوه وبتعلم منه، المستشفى دي كان المفروض يتعملها معمل نووي لعلاج الاشعاع بـ46 مليون دولار، مستعدين لمستشفى عالمي يجي ياخدها القطاع الخاص ونشترى منه الخدمة وهو يديرها واحنا الخدمة هتبقا ببلاش للناس، ولكن إدارة عالمية بالقطاع الخاص ونشترى منه الخدمة، حبيت أقول الكلمتين دول ان الممكن القطاع الخاص يعمل مستشفيات».
وقال الرئيس السيسي: «إذا كنتم عاوزين تضمنوا مسار ناجح، الدولة تخلص تلاتة ارباع المشوار وتسيب الربع للقطاع الخاص يعني أعمل المستشفى بالمواصفات اللي أنت عاوزها، وأديهالك وأنت تديرها كأنك أنت عملتها، لأن لو علشان اديهاله هيعوز تخصيص حتة أرض والتصميم والتنفيذ وقرض من البنك علي ما تخرج المستشفى تاخد من 5 – 7 سنوات، معايا انا بقا تاخد سنتين وبقوله انا خلصتلك المشوار تعالي دير، الفكرة علشان موضوع العلاج في مصر بنقول انا ممكن يكون عندي 700 مستشفى لكن ظروف ادارتنا قد تكون غير مشجعة وغير محفزة».
تابعوا آخر أهل مصر على Google News
