العريس صاحب واقعة «العروسة المغصوبة بالكوافير» في البحيرة: أنا كرهت حياتي

كشف العريس صاحب واقعة «العروسة المغصوبة في الكوافير»، بمحافظة البحيرة، كواليس جديدة عن ماحدث خلال الفيديو المنتشر على وسائل التواصل الاجتماعي.

وقال العريس في بث مباشر على صفحة «أهل مصر»، «أنا مقولتش لحد ينشر الفيديو وكان في سوء تفاهم بيني أنا وعروستي يوم الفرح، صاحبة الكوافير نشرت الفيديو اتوقف حالي واتخرب بيتي، أنتي ليه بتنشري الفيديو؟!.. ليه بتعملي معايا كده؟!، أنا معدتش عارف اعمل اية، صاحبة الكوافير بهدلت حياتي وأنا بطالب بحقي عشان اتبهدلت واتهانت.. ومش عارف اعمل اية؟».

العريس: كله ده عشان بسبب اني مجبتش بوكيه ورد ومعنديش بدلة

وتابع قائلًا: «كله ده عشان بسبب اني مجبتش بوكيه ورد ومعنديش بدلة.. أنا ظروفي المادية صعبة وكنت عايز أخلي عروستي أحسن من أي حد، وأنا مكنش معايا اجيب بدلة وهي كانت زعلانة مني وحصل سوء تفاهم بيني وبينها.. أنا بشتغل سريح والناس كلها عرفاني ومصدر أكل عيشي بين أيد الناس، ليه الميكب ارتيست بـ تنشر الفيديو على السوشيال وتفضحني محدش أدالك الأذن تنشري الفيديو.. أنا بطالب بحقي ومبقاش ليه عين أطلع تاني ومش عارف أقابل حد».

واختتم حديثه قائلًا: «أنا مش مستوعب اللي حصلي وأنا معرفش يعني ايه تريند، ومفهمتش اللي حصل غير لما شوفت الفيديو لأني مبعرفش اتعامل في التليفونات، أنا نفسي أخلي عروستي أحسن الناس مش فارق معايا حياتي لأن طول عمري متبهدل، أنا نفسي أعمل أي حاجة عشانها، أنا صاحبي اشترى ليه دبلة الخطوبة بـ 40 جنيه على حسابه، واستلفت فلوس عشان الخطوبة، أنا عايز خطيبتي أحسن مني ومش فارق معايا حياتي».

عروستي شرياني وبتحبني ومش عايزة ابعد عنها، بس أنا معدتش قابل حياتي تاني.. أنا حياتي ادمرت وكرهت حياتي بعد ما شفت الفيديو، ومش قادر أنزل من البيت أشتغل ومعدش ليه نفس أشوف حد، أنا مبعرفش أقراء او أفك الخط ونفسي أعيش بالحلال، أنا معيش فلوس أجيب بدلة، ومركب شرايح ومسامير.