تتشابه الاوجاع ، و تتلاقى الالام لامهات مكلومة فى ابنائهن الذين تعرضن للقتل بدم بارد فى احداث جاءت نتيجة الاخطاء البشرية المتكرره د والتى يدفع ثمنها شباب فى عمر الزهور، و أمهات يظلن يدفعن الثمن وجع ، ودموع وألم ، و جراح طوال حياتهن .
لم تستطع والدة عمر شريف الطالب الذى راح ضحية دهس سيارة مسرعة امام كلية العلوم ببورسعيد مع اثنين من أصدقائه ، و الابن الوحيد لها ، إلا أن تتجرع مرارة الحزن مرة آخرى مع فقد السباح يوسف عبد الملك ، و استعادت مره اخرى ذكريات الالم ، و مرارة الفقد ، و هو ما دفعها الى رسالة
رسالة لوالدته تواسيها بها .
قالت والدة عمر :' اتفرجت على فيديوهات أم يوسف ، هى مست قلبى قوى ، أنا مش عارفه اقول لها ايه ، و أواسيها اذاى ، أنا قلبى تعبنى بسببها ، بس عوزاها تشد حيلها و تعرف أن أبنها والله ان شاء الله فى الجنة نفسى تعرف ان ربنا اختاره و اختارها هى كمان يا رب يصبرها و يربط على قلبها .
الجنة مستنياكي
وأضافت السيدة المكلومة ، صدمه كبيرة جدا ما يحسش بيها الا أم ذيها بالضبط ، مش ها أقدر أقول لها غير البقاء و الدوام لله ، أنا كان نفسى أروح لها العزاء بس بجد مش قادرة نفسى اشوفها، وأخدها فى حضنى وأقول لها شدى حيلك الجنة ان شاءالله مستنياكي يا بنتى
حاولى تثبتى ، و تعرفى إن ربنا كتبلك و كاتب له ان الناس كلها بتدعي له ،
شبه عمر ابنى
و تابعت والدة عمر ، أنا قاعدة على سريرى ، و بقلب فى الفيديوهات قلبى وجعنى ، تعبنى ، أنا مش عارفه اقولها ايه؟ بس بحس انه شبه عمر ابنى قوى ' عمر الله يرحمك يا ابنى ' عمر كان جميل جدا ، يا رب اثبتى ، و اعرفى ان ربنا اختارك و اختار يوسف علشان يضرب به المثل .
لما بنرضى ربنا بيصبرنا
وقالت والدة عمر :" انا عاوزه اقولها ان ربنا معايا جدا و مدينى الامان فى بيتى انا عايشه لوحدى الوقتى ، حاسه انه حوليا ربنا ، و العمره اللى طلعتها خلتنى فى حتة تانيه خالص لما بنرضى ربنا بيصبرنا ، قبل وفاة عمر كان فيه وفاة شريف زوجى و والدتى و الوقتي انا بقيت لوحدى فى البيت اللى كنت بعمله علشان ابنى هما الاتنين راحوا و انا قاعده لوحدى .
اجمدي ، و اثبتي
و أختتمت والدة عمر ضحية الدهس ، الحمد لله و الشكر لله بحاول انى اعيش و اكمل الدنيا اللى انا فيها كلها علشان خاطر اروح لهم و ربنا راضى عنى نفسى ارضى ربنا و ربنا يرضى عنى ، شيدي حياك و اعرفي ان كاتب لك الاحسن و الله العظيم ربنا ما بيرزقش حد بالابتلاء الا لما يكون هو راضى عنه اجمدي ، و اثبتي و اعرفي ان يوسف فى الجنة ان شاء الله ، و نحتسبه عند الله منً الشهداء يا بنتى البقاء و الدوام لله نفسى توصلك رسالتى انا قلبى معاكى يا رب ارحمهم و اغفر لهم
يا رب يربط على قلبك يا ام يوسف ، و على قلبى ، و على قلب كل أم فقدت ابنها ، يا رحمن يا رحيم انت ارحم الراحمين.
تابعوا آخر أهل مصر على Google News
