روى شقيق الأشخاص الذين ظهروا في فيديو واقعة إلقاء أكياس مياه على المصلين بمسجد الصديق بمنطقة شيراتون، تفاصيل الواقعة كاملة، مؤكدًا أن ما حدث تم تفسيره بشكل خاطئ.
وقال في فيديو نشره على صفحته: «إحنا كعيلة بقالنا حوالي 6 سنين بنتجمع كل عيد على عمل خير، كنا بنجهز بلالين نحط فيها فلوس وبومبوني وحلويات، وبعد ما صلاة العيد بتخلص بنطلع من البلكونة ونرميها للناس، والناس كانت بتتبسط جدًا وبقت مستنية الموضوع ده كل سنة».
وأضاف: «سنة من السنين لما ما عملناش الموضوع، الناس سألت علينا واستنتنا، فده خلانا نكمل فيه، لأن الهدف كان بس نفرّح الناس».
وتابع: «السنة اللي فاتت بعد ما رمينا العيديات، خدنا بالنا إن في ناس اتجمعت حوالين عربيتنا وطلعوا فوقها، والعربية اتضررت جدًا، بس ما عملناش مشكلة وعدّينا الموضوع واحتسبناه عند ربنا».
واستكمل: «السنة دي عملنا نفس الحاجة، وجهزنا البلالين، ولما خلصت بدأنا نرمي العيديات من كيس فيه فلوس وحلويات عشان نفرّح الناس، لكن نفس الموقف اتكرر، والناس اتجمعت حوالين العربية بشكل أكبر، وكان في طفل فوق العربية، فاضطرينا ننزل بنفسنا ونبعدهم».
وأوضح: «بعد ما طلعنا تاني، لقينا الناس بتتجمع تاني حوالين العربية، وساعتها الموضوع زاد عن حده، فحاولنا نبعدهم بأننا نرمي أكياس مية على العربية مش على الناس».
شقيق المتهمين
وأشار إلى أن «بعض الموجودين بدأوا يشتموا ويوجهوا إهانات لينا، وكان في تحرش لفظي بأخواتي البنات، فكان أقل رد فعل إنهم يردوا، وفي ناس ردت بأكياس ميه».
وقال: «الفيديو اللي اتنشر كان لأخويا وهو بيرد على الشخص اللي كان بيشتمه بنفس الأسلوب، دفاعًا عن نفسه وعن أخواته، ومش بقول إن ده صح، بس ده كان رد فعل، وهو اختار يستفزه بدل ما ينزل يتخانق معاه».
وأضاف: «للأسف في كيس مية اتحدف من طفل وجت في سيدة، وأنا بعتذر لها جدًا وبتمنى تكون كويسة، لأن ده ما كانش مقصود خالص».
واختتم حديثه قائلًا: «اللي حصل كله كان رد فعل من شباب بيدافعوا عن نفسهم وعن أهلهم بعد شتيمة وحاجتهم بتتكسر، لكن الموضوع كبر جدًا واتحول لاتهامات على السوشيال ميديا، وفي كلام غير حقيقي اتقال عننا، رغم إن اللي حصل كان هدفه في الأساس بس إدخال الفرحة على الناس».
وكانت قد كشفت الأجهزة الأمنية بمديرية أمن القاهرة، ملابسات مقطع فيديو تم تداوله بمواقع التواصل الإجتماعى تضمن قيام بعض الأشخاص بإلقاء أكياس مياه على المواطنين عقب صلاة عيد الفطر بدائرة قسم شرطة النزهة بالقاهرة.
وبالفحص أمكن تحديد وضبط مرتكبى الواقعة (أحد الأشخاص ونجليه)، وبمواجهتهم اعترفوا بإرتكاب الواقعة وعللوا قيامهم بذلك بسبب جلوس المصلين على سيارة الأول وخشيتهم من حدوث تلفيات بها، وتم اتخاذ الإجراءات القانونية، وتولت النيابة العامة التحقيقات.
تابعوا آخر أهل مصر على Google News
