قالت رشا عباس، محامية الأم ضحية اعتداء أولادها بالسيدة زينب: «اللي حصل معاها حاجة توجع القلب، عيالها نازلين فيها ضرب من الساعة 3 بالليل لحد بعد العصر، واحد نازل فيها بالأقلام والتاني ماسك عصاية المقشة وبيضربها بيها بكل قسوة، والأصعب من كده إن واحد فيهم داس على وش أمه بالجزمة.. كل ده ليه؟ علشان عايزين يجبروها ويمضوها بالعافية على عقود تنازل عن شقتها اللي حيلتها».
وأضافت الدفاع، في تصريحات خاصة لـ'أهل مصر'، أن شقيق المجني عليها، والذي يقطن في الشقة المجاورة لها، تدخل لإنقاذها بعد سماع استغاثتها وصراخها المتواصل، حيث قام بتوثيق الواقعة بمقطع فيديو ونشره عبر منصات التواصل؛ ما أسفر عن سرعة ضبط المتهمين وإحالتهم للمحاكمة العاجلة.
وأوضحت المحامية رشا عباس، قائلة: «دي مش أول مرة يمدوا إيدهم عليها، دي سادس مرة يضربوها بالبشاعة دي، وفي كل مرة كانت بتروح تعمل محاضر في القسم، بس قلوب الأمومة كانت بتحن ويرجعوا يستعطفوها فتبكي وتتنازل.. لكن المرة دي الوضع مختلف تمامًا».
وعن كواليس الجلسة وما دار داخل قفص الاتهام، تابعت المحامية: «المتهمين قعدوا يعيطوا من جوة القفص ويستعطفوا أمهم قدام الكل ويقولوا لها: 'يا أمي خلاص إحنا آسفين.. ما تضيعيناش وما تحبسيناش وحرمنا'.. بس الأم المرة دي قفلت الباب تمامًا ورافضة أي تنازل، وقالت خلاص هحبسهم علشان يتربوا وما يتكررش الكلام ده تاني».
وقضت محكمة جنح السيدة زينب، بمعاقبة الشقيقين المتهمين بالاعتداء على والدتهما بالضرب والسب داخل مسكن الأسرة، بالحبس سنة و6 أشهر وغرامة 10 آلاف جنيه لكل منهما.
تابعوا آخر أهل مصر على Google News
