أدلى 'الحسيني.ج.م.م.ع'، 30 عامًا، عامل بسوبر ماركت، مقيم قرية الشقة مركز قلين بمحافظة كفر الشيخ، والمتهم بقتل والديه وشقيقه داخل منزلهم الكائن بالقرية؛ بسبب خلافات مالية بينهم لعدم رغبتهم في مساعدته ماليًا من أجل الزواج، باعترافات تفصيلية أمام جهات التحقيق بمحافظة كفر الشيخ حول ارتكابه الواقعة.
وقال المتهم بقتل والديه وشقيقه في اعترافاته أمام جهات التحقيق بمحافظة كفر الشيخ أنه كان هناك سوء تفاهم بينه وبين شقيقه 'المجني عليه' بسبب قطعة أرض، وتم عقد جلسة عرفية انتهت بالتراضي، وأن كل شخص منهم سيأخذ نصيبه من الأرض، وتم بيع الأرض لأحد المشترين، 'أخويا طلب مني 10 آلاف جنيه عشان البيعة تتم، وأنا وافقت عشان هو اللي بيخلص كل الإجراءات ووالدي كان معتبره كبير البيت والبيعة تمت وكان قيمتها 460 ألف جنيه، واتفقنا الفلوس هتتقسم على سنتين 230 ألف أول سنة، والباقي بعد سنة، وأنا أخدت 80 ألف جنيه، وسافرت إسكندرية وفضلت متابع الموضوع عشان نتكلم في تفاصيل باقي الفلوس، وأنا في الفترة دي ما اتواصلتش مع أخويا محمد خالص وكنت سايب الموضوع كله مع المحامي'.
اعترافات المتهم بقتل والديه وشقيقه
وتابع المتهم بقتل والديه وشقيقه في اعترافاته أنه في كل إجازة عندما ينزل للمنزل بالقرية كان يتحدث مع شقيقه المجني عليه بشأن باقي مستحقاته المالية لديه، 'ماكنش بيديني رد، وفضل الموضوع زي ما هو وأن ليا فلوس عند محمد أخويا وما أخدتهاش ومقعدناش القعدة، وطول الفترة من شهر 6 لحد شهر 11 وانا بحاول دايمًا أبعد عن المشاكل مع محمد، ولا عمري حصل بيني وبينه مشكلة في الفترة دي لحد الأسبوع التاني من شهر 11'.
وأضاف المتهم في اعترافاته: 'روحت القاهرة عشان كان عندي إعادة كشف لأني كنت زارع شعر، ورجعت إسكندرية في نفس اليوم، وتاني يوم رجعت البلد بالليل، وسألت أمي الأكل فين وأكلت ونمت، وتاني يوم بعد المغرب سألت والدتي أخويا هيقعد امتى عشان نخلص موضوع الأرض قالت لي هو بره استنى لما يجي، قولت لها أنتوا كده تعبتوني وخسرتوني، قالت لي استني لما أخوك يجي من بره، وساعتها محمد دخل في وقت كلامي مع أمي'.
وأردف المتهم بقتل والديه وشقيقه في اعترافاته قائلًا: 'محمد أخويا دخل وانفعل وكان بيزعق بس مركزتش في الكلام وكان في إيده منجل لأنه كان راجع من الأرض فكان معاه ساعتها، لما حسيت أنه عايز يعمل مشكلة روحت عشان ألم هدومي من الشقة التانية وبعد ما دخلت الشقة وبحط إيدي في البترينة اللي في الصالة لقيت سكينة خدتها ومسكتها بإيدي اليمين، ولقيت شاكوش مسكته بإيدي الشمال، عشان لو محمد عمل معايا مشكلة ولا حاجة يخاف مني وأخد هدومي وأمشي'.
إحالة المتهم بقتل والديه وشقيقه للمفتي
وقضت محكمة جنايات فوه، الدائرة الأولى، اليوم الأربعاء، حضوريًا، وبإجماع آراء أعضائها، بإحالة أوراق المتهم بقتل والديه وشقيقه ذبحًا داخل المنزل في قرية الشقة التابعة لمركز قلين، لفضيلة المفتي؛ لأخذ الرأي الشرعي في عقوبة إعدامه.
صدر الحكم برئاسة المستشار أحمد عزت مزيد محمد، رئيس المحكمة والدائرة الأولى، وعضوية المستشارين هيثم محمود حسن أبو حطب، وأحمد عبد السلام عبد الحسيب مقلد، وسكرتارية أحمد جبر، وذلك في أحداث القضية رقم 4728 لسنة 2022 جنح مركز دسوق، والمقيدة برقم 2319 لسنة 2023 كلي كفر الشيخ.
تابعوا آخر أهل مصر على Google News
