حصل موقع «أهل مصر» على نص إعترافات «احمد.ا.ر.ا» 20 عامًا المتهم بقتل المُعلم مصطفي أبو شوشة 26 عامًا، والذي توفي غدرًا بعد أن إستدرجة القاتل بهدف سرقة التوكتوك الخاص به بمركز تلا التابع لمحافظة المنوفية.
والدة المجني عليه حاملة صورته
اعترافات القاتل
وروى المتهم بقتل المُعلم تفاصيل الحادث قائلاً، اللي حصل انا عندى اخ وعندى اختين اصغر منى وانا شغال حلاق بقرية صناديد بمحافظة الغربية، وانا عايش في بيت تبع عمى وكنت متجوز فيه والدنيا كانت ماشية عادي وربنا كرمنى بحسن من حوالي 3 شهور وبعد كدة الدنيا كانت ضيقة خالص وابويا كان بيتخانق معايا علطول علشان مكنتش لاقي شغل لحد اما طردني من البيت والكلام دة من حوالي خمس ايام قبل الحادث ومكنتش لاقى حتة اروح فيها وأخدت مراتى وابني وقعدت في ارض زراعية وكنت بطلع اسرح في الخردة بس مكانتش بتجيب همها.
النيابة العامة
وأضاف المتهم في الاعترافات أمام النيابة العامة، فجاتلى فكرة اني أسرق علشان اقدر اجيب مصاريف اصرف على أسرتي بيها وبالفعل الفكرة جت في دماغي قبل الحادثة بيوم والفكرة اني أوقف توك توك اقول له يقوم بتوصيلي ومن ثم تثبيته بسكينة واخد منه التوك توك والتليفون وبالفعل يوم الأربع انا كان معايا سكينة من ايام ماكنت بسرح في الخردة وخدتها وروحت سنتها عند حداد في البلد عندنا ويوم الأربع بليل انا اتوجهت على مدينة تلا علشان دى اقرب حاجة ليا وركبت مع واحد معرفوش علشان يوصلني بابل ومن بابل خدت مواصلة بـ3 جنيه علشان توصلني على تلا ووصلت تلا حوالى الساعة 10:30 مساءً ووقفت بعد ما تعدى السكة الحديد يمين تقريبا قدام المستشفى الناحية الثانية انا كنت واقف مستني توك توك بعدى علشان اطلب منه يوصلني كفر الشيخ سليم وكنت عامل حسابی اول ما نوصل لطريق مقطوع انا عارفة هقولو دخلني جوة بحجة ان انا مطلع اركب من على السال علشان انا مسافر وبالصدفة انا لاقيت مصطفى دة معدى فى وقفتة وقلتلة تعالى وديني دخلة قبل قرية كفر الشيخ سليم علشان اركب واسافر ومتفقناش على اى فلوس وبالفعل ركبت معاهو التحركنا على 10:45 مساء يوم الأربعاء.
والدة المجني عليه حاملة صورته
معلم المنوفية
واستكمل قاتل مُعلم بالمنوفية: «إتحركنا على الطريق وأول ما جت الدخلة إلى انا كنت عارفها قبل كدة وانا عارف الدخلة دى انها مقطوعة ومفيش فيها حد خالص بيبقى موجود غير اخر الطريق شوية بيوت لكن فأولة مفيش اى بيوت وبالفعل أول مادخلت الطريق قلتلة اقف هنا وساعتها هو كان وقف ساعتها وانا رفعت السكينة على رقبتة وقلتلة سيب التوك توك وساعتها هو قالى انا مش هسيب التوك توك قمت خابطة في كتفة وساعتها هو نزل من التوك توك وجرى مسافة خمسة متر في اتجاه البيوت وبعد ماجرى وقع على شط البحر وانا ساعتها روحت خت التليفون من جيبة وزقيتة فى الترعة وهو ساعتها مكنشبتكلم خالص وبعد ما خذت التليفون رجعت خدت التوك توك ورجعت ماشى على نفس الطريق وبعدها كملت على الطريق وعديت من نفق صغير تحت الطريق الدولي ورميت السكينة الى كانت معايا في الملاحة ومنة روحت على صناديد ووقفت التوك توك في جراج بتاع واحد اسمة ميخا وانا ساعتها قلتلة بكرة هحاسبك والكلام ده كان الساعة 11:20، وروحت على البلد بتاعت صناديد علشان اشوف شقة ايجار انقل فيها مراتى وابنى وبالفعل اتفقت مع الراجل على بكرة هجيلة 500 جنيه، وانقل في الشقة وبعد كدة قابلت واحد معرفة اسمة احمد عثمان وقلتلة تشتري توك توك معايا وقالي التوك توك دة منين قلتلة انا جايبة من تلا عن طريق شمال وبعد كدة قالي انا هشترية منك واتفقنا على خمس الاف جنية وساعتها انا روحت جيبت التوك توك من الجراج وبعد ماجبتة اداني 3000 جنيه، وقالي انا بكرة هديك الألفين الثانين وبعد كدة اديتهوله وروحت على مراتى وابني في الأرض الزراعية لحد الصبح علشان اخد مراتي وابني واروح الشقة الى انا اجرتها وثاني يوم قمت عادى نزلت الشارع في قلب البلد وسيبتهم مكانهم علشان اروح ادفعلو الفلوس وقعدت الف لحد اما الراجل شغلة ولاقيتة بيقولى طيب سيبنى شوية وتعالالي فأنا سببتة لحد الساعة 11، ونص بليل يوم الخميس وقلت اروح اشوفو وساعتها انا قابلت احمد عثمان إلى خد مني التوكتوك لاقيتة بيقولى تعالى تشرب شاي على القهوة علشان الحكومة مالية الدنيا وبالفعل أول ما روحت القهوة لاقيت الحكومة مستنياني وبعد كدة سالوني على اللي حصل حكيتلهم كل حاجة وبعد كدة جبتلهم الموبايل، والتوكتوك كان مع أحمد وهو اللى اداه للحكومة وهو دة كل الى حصل وانا كل الى كنت اقصدة أني أسرق التوكتوك من الواد بس، لما هو عارض اضطريت أخبطة وبعدها لما وقع رميتة في الترعة».
شبين الكوم
وكانت قد أجلت محكمة جنايات شبين الكوم بمحافظة المنوفية قضية مقتل مُعلم صباحًا وسائق توكتوك ليلاً لتحسين دخلة بقرية طوخ دلكة التابعة لمركز تلا، للأربعاء 28 من فبراير الجاري.
وتعود تفاصيل الواقعة لتلقي اللواء عمرو عبد الرؤوف، مدير أمن المنوفية، إخطارًا من مأمور مركز تلا، يُفيد بمصرع «مصطفي أبو شوشة 26 سنة»، من قرية «طوخ دلكة».
وبالإنتقال والفحص تبين العثور على جُثته أعلي سطح البحر بقرية «كفر الشيخ سليم» في محافظة الغربية، وتم نقل الجثمان لمستشفى شبين الكوم التعليمي.
وتمكنت وحدة مباحث مركز تلا من ضبط المتهم في واقعة القتل، وتم تحرير المحضر اللازم بالواقعة، وأخطرت النيابة العامة لمباشرة التحقيقات.
تابعوا آخر أهل مصر على Google News
