تواصل 'أهل مصر' سلسلة انفراداتها بنشر أقوال واعترافات المتهم 'كريم.م' المُلقب بـ سفاح التجمع خلال التحقيقات الجارية معه، في اتهامه بإنهاء حياة فتيات ليل عقب ممارسة الرذيلة معهن وتعذيبهن وإجبارهن على تناول المواد المخدرة.
اعترافات سفاح التجمع
و قال المتهم أمام جهات التحقيق في القضية المقيدة برقم 296 لسنة 2024 إداري الجنوب ثان بورسعيد: 'مراتي لبنى زهقت من المنصورة وقالت لي لازم نمشي من هنا، وكنت محوّش فلوس ورحنا تاني على القاهرة، أجرّنا دوبليكس في التجمع وفتحنا مشروع وشم وميكروبلدينج، والمشروع كان ناجح معانا'.
وأضاف سفاح التجمع: 'مراتي بتشتغل في الميكروبلدينج وأنا وواحد صاحبي معايا شغالين في الوشم والبرسينج، وأنا اللي كنت بعمل البرسينج عشان مكنتش بقلق من الدم وكنت بعمله في كل حتة في الجسم'.
غيرة مراتي
وتابع سفاح التجمع، في أقواله: 'استمر المشروع لمدة سنة، ولكن المشاكل كترت بسبب غيرة مراتي، لأن كل زبائن المكان ستات وكانت هتوصل للطلاق وكان في مشاكل كتيرة وكنا هنسيب بعض، لكن هي بدأت تدور على شغل لنفسها'.
سفاح التجمع شغل السفاح فى بورسعيد
مدرس بمرتب 25 ألف جنيه
وأردف سفاح التجمع في اعترافاته: 'لقينا مدرسة جديدة بتفتح في بورسعيد، وعايزة مدرسين أجانب، فروحت أنا ومراتي وعملنا المقابلة ونجحنا وكان المرتب 25 ألف جنيه لكل واحد فينا، وكان الكلام ده تقريبا في آخر 2018، وكان لينا خصم 50% لمصاريف ابننا والشقة على حسابهم وقعدنا في بورسعيد 3 سنين'.
وأضاف: 'كانت حياتنا مستقرة شغل وسكس ومخدرات وشغل، وأنا اللي مهتم بابننا وبعدها زي ما عملت في المنصورة قالت لي إنها زهقت وعايزة ترجع القاهرة وأنا رفضت لأني كنت مبسوط في بورسعيد وحياتي مستقرة'.
مراتي خانتي
وواصل سفاح التجمع اعترافاته قائلا: 'مراتي سابتني ورجعت على القاهرة وأجرّت شقة لوحدها، وعرفت إنها بتخوني وبقيت أراقبها ونزلت من بورسعيد في يوم وهي كانت قاعدة في كافيه ومعاها اللي بتخوني معاه، وراقبتهم وكنت بصورهم دخلوا محل اشتروا خمرة وأنا بصورهم وبراقبهم، شافوني وأنا معايا المحامي وفضلت فاتح الكاميرا وبصور وركبوا العربية ومشيت وراهم'.
وتابع: 'هربوا مني وروحت على مدينتي عشان أدوّر على الشقة اللي هي قاعدة فيها، وشافوني تاني وهما بالعربية وراحت على قسم الشرطة وهناك حجزوها هي لأني كنت بالفعل عامل محضر فيها في نفس القسم، وثاني يوم اتعرضت على النيابة وخرجت على ذمة القضية وبعدها اختفت وقفلت الأكونتات بتاعتها'.
هربت على إنجلترا
وأضاف: 'أنا بعد كده قدّمت أدلة الزنا في النيابة، لكن هي كانت هربت على إنجلترا، واللي مصاحباه اتحبس في قضايا تانية واتسأل في القضية دي واعترف باللي عمله معاها، وفي المحاكمة هما الاثنين خدوا براءة'.
ابنى قالى ماما مش بتحبني
وتابع المتهم في أقواله: 'حسيت بعد الموضوع ده إني قليل قوي، مراتي خانتني ومعرفتش آخد حقي، وعرفت إنها بتبعت فلوس لعشيقها من إنجلترا ومبتسألش على ابنها ولا حتى في عيد ميلاده، والولد كل شوية يسأل عليها ويقولي: ماما مش بتحبني ولا حتى بتبعت رسالة تسأل على ابنها، الموضوع ده أثر في نفسية ابني'.
وأضاف: 'معرفتش آخد حقي منها عشان سافرت برة وقفلت كل الأكونتات، وأهلي قالولي خلاص انسى الموضوع ده، وأنا كان كل خوفي إنها تظهر تاني وتاخد ابني، وسمعت كلام أهلي وهي لسة عايشة في إنجلترا وبتنزّل ستوريهات وفيديوهات على إنستجرام وتيك توك'.
بجيب بنات في الشقة
وأكد: 'قررت أثبت لها إني مش محتاج ليها وعملت علاقات مع ستات كتير ومع أي واحدة بقابلها وبصورهم، وأقمت علاقات مع ثلاثة في بورسعيد لحدّ لما استلمت شقتي في التجمع وانتقلت ليها في يناير 2023، وكملت، كنت بجيب بنات في الشقة ومارست معهم الرذيلة واتعرفت على بنات كتير ومارست الرذيلة مع بنات أكثر'.
واستطرد: 'كل ده عشان لما أتقابل معاها أوريها إني مش محتاج لها وأثبت لها إني راجل وإن الشغف اللي كان بيحصل معاها في تصوير العلاقة الجنسية كنت بعمله مع أي حد وإني مش محتاج لها في حاجة وكنت عايز أثبت لنفسي إني لسه كويس وإن الستات عايزاني ويتمنوا أكون معاهم، وكنت بتضايق تاني لما أشوفها على إنستجرام وتيك توك'.
تابعوا آخر أهل مصر على Google News
